ՄԱԿ-ը քվեարկել է Ուկրաինայից ռուսական զորքերի դուրսբերման համար. 141 կողմ, 5 դեմ, 35 ձեռնպահ
ՄԱԿ-ի Գլխավոր ասամբլեան արտահերթ նիստում ընդունել է Ուկրաինայում ռազմական գործողությունները դատապարտող բանաձեւ։ Փաստաթուղթը պահանջում է, որ Ռուսաստանը անհապաղ դադարեցնի ուժի կիրառումը, ինչպես նաև Ուկրաինայի միջազգայնորեն ճանաչված սահմաններից ռուսական բոլոր զորքերի ամբողջական և անվերապահ դուրսբերումը։ Միաժամանակ, բանաձեւը կոչ է անում Մոսկվային չեղարկել Դոնեցկի և Լուգանսկի անկախությունը ճանաչելու որոշումը։ Կողմ է արտահայտվել 141 երկիր, դեմ՝ 5, ձեռնպահ՝ 35։
Բացի Ռուսաստանից, նախաձեռնությանը չեն աջակցել Բելառուսը, Սիրիան, Հյուսիսային Կորեան և Էրիթրեան։ Ձեռնպահ են քվեարկել Չինաստանը, Հնդկաստանը, Իրանը, Ղազախստանը, Հայաստանը և այլք։
Կազմակերպությունում Ռուսաստանի մշտական ներկայացուցիչ Վասիլի Նեբենզյան ասել է, որ արևմտյան երկրները դիմել են ՄԱԿ-ի մի շարք պատվիրակություններին ուղղված ուղղակի սպառնալիքների, որպեսզի նրանք կողմ քվեարկեն բանաձեւին։ Չինաստանի պատվիրակության ղեկավար Չժան Ջունը, որը ձեռնպահ է մնացել քվեարկությունից, նշել է, որ բանաձեւը, հաշվի չի առնում ներկայիս ճգնաժամի պատմությունն ու բարդությունը։ Ի տարբերություն Անվտանգության խորհրդի բանաձևերի՝ Գլխավոր ասամբլեայի բանաձևերը իրավաբանորեն պարտադիր չեն:
