Ղազախստանի նախագահ Կասիմ-Ժոմարտ Տոկաեւը իր նոր դիմումով հրաման է տվել իրավապահ մարմիններին եւ բանակին «ահաբեկիչների» դեմ դիմահար կրակ բացել առանց նախազգուշացման։
Ղազախստանի նախագահի ելույթի տեքստը հրապարակել է պետության ղեկավարի մամուլի ծառայությունը։
«Մեր երկրում շարունակվում է հակաահաբեկչական գործողությունը։ Ոստիկանության, Ազգային գվարդիայի եւ բանակի ուժերով իրականացվում է մասշտաբային եւ կարգավորված աշխատանք Սահմանադրությանը համապատասխան իրավակարգ հաստատելու ուղղությամբ։
Երեկ իրավիճակը Ալմաթի, Ակտոբե քաաքներում եւ Ալմաթիի մարզում կայունացել է։ Արտակարգ դրության ռեժիմ մտցնելը արդյունքներ է տալիս։ Ամբողջ երկրում վերականգնվել է սահմանադրական օրինականությունը։
Բայց ահաբեկիչները նախկինի պես վնաս են հասցնում պետական եւ մասնավոր ունեցվածքին, կիրառում են զենք քաղաքացիների հանդեպ։
Իրավապահ մարմիններին եւ բանակին հրաման եմ տվել դիմահար կրակ բացել առանց նախազգուշացման։
Մենք ստիպված էինք գործ ունենալ զինված եւ պատրաստված ավազակների հետ, ինչպես տեղի, այնպես էլ օտարերկրյա։ Հենց ավազակների եւ ահաբեկիչների։ Ուստի նրանց պետք է ոչնչացնել։ Եվ դա կարվի առաջիկայում»,- ասել է նա։
«Կցանկանայի անկեղծ երախտագիտություն հայտնել Հայաստանի վարչապետին, որը նախագահում է ՀԱՊԿ-ում, ինչպես նաեւ Բելառուսի, Ղրղզստանի, Տաջիկստանի նախագահներին։
Երախտագիտության հատուկ խոսքեր եմ հասցեագրում Ռուսաստանի նախագահ Վլադիմիր Պուտինին։ Նա շատ օպերատիվ, եւ որ գլխավորն է՝ ընկերաբար ջերմ արձագանքեց իմ դիմումին։
Երախտագիտություն եմ հայտնում նաեւ Չինաստանի նախագահին, Ուզբեկստանի, Թուրքիայի նախագահներին, ՄԱԿ եւ միջազգային այլ կազմակերպությունների ղեկավարներին սատարման խոսքերի համար»,- ավելացրել է Տոկաեւը։
Նշենք, որ Ղազախստանի իշխանությունները «ահաբեկիչների» հայտնվելու մասին սկսեցին խոսել միայն այն բանից հետո, երբ կորցրին երկրում իրավիճակի վերահսկողությունը։ «Նուր Օթան» («Հայրենիքի լույսը») կառավարող կուսակցությունը մինչեւ հիմա ի վիճակի չգտնվեց անգամ հանդես գալու հայտարարությամբ, չգումարվեց նաեւ Ղազախստանի խորհրդարանը։ Արեւմտյան ԶԼՄ-ները, քաղաքացիական հատվածի եւ ընդդիմության ներկայացուցիչները նախօրեին հայտարարել էին, որ զինվորականները կրակ են բացել գերազանցապես անզեն երիտասարդների ուղղությամբ։
News.am
