ԱԺ ընդդիմադիր պատգամավորներին 4 ամիս ապօրինի կալանքի տակ պահելու համար պատասխանտու են ՀՀ գլխավոր դատախազը և կալանքի միջնորդությունը բավարարած բոլոր դատավորները. ֆեյսբուքյան իր էջում գրել է «Հայաստան» խմբակցության անդամ Արթուր Ղազինյանը։
«Նրանցից և ոչ մեկը չդիմեց ՀՀ Սահմանադրական դատարան, չնայած որ առկա էր հիմնավոր և ողջամիտ կասկած ԱԺ պատգամավորներին առանց ԱԺ համաձայնության անազատության մեջ պահելու սահմանադրականության մասով և պարտավոր էին դա անել:
Նշված անձանց պատասխանատվության ենթարկելու գործընթացը կմեկնարկի շուտով:
Հ.Գ. Սահմանադրական դատարան դիմումը ներկայացրել էին ՀՀ ԱԺ ընդդիմադիր պատգամավորները՝ կիրառելով իրենց մանդատի սահմանադրական լիազորությունը», – գրել է Ղազինյանը։
Հիշեցնենք, որ դեկտեմբերի 10-ին կալանքից ազատվել են «Հայաստան» խմբակցության պատգամավորներ Արմեն Չարչյանը, Մխիթար Զաքարյանը և Արթուր Գրիգորյանը։ Գործել է Սահմանադրության 96-րդ հոդվածը, որին փաստաբաններն ամիսներ շարունակ հղում էին կատարում, իսկ դատարանն ու դատախազությունը պատգամավորի անձեռնմխելիությունը պաշտպանող այդ հոդվածն անտեսում էին։
