Ազգ

Day:Ապրիլի 9, 2024

  • Կոչ ենք ուղղում ՀՀ իշխանություններին` հրաժարվել պարտվողական գործելաոճից. Մայր աթոռի հայտարարությունը` Տավուշից տարածքներ հանձնելու վերաբերյալ

    Կոչ ենք ուղղում ՀՀ իշխանություններին` հրաժարվել պարտվողական գործելաոճից. Մայր աթոռի հայտարարությունը` Տավուշից տարածքներ հանձնելու վերաբերյալ

    Վերջին շրջանի զարգացումները այլևս կասկած չեն թողնում, որ Հայաստանի իշխանությունները Արցախի լիակատար հայաթափման և ՀՀ տարածքների բռնազավթման պայմաններում, տեղի տալով Ադրբեջանից հնչող սպառնալիքներին, պատրաստվում են վերջինիս հանձնել Տավուշի մարզից տարածքներ նախքան ենթադրվող սահմանազատումն ու սահմանագծումը, նշված է Տավուշի մարզից տարածքներ հանձնելու վերաբերյալ Հայաստանի Եպիսկոպոսների և Թեմակալ Առաջնորդների հայտարարության մեջ։

    «Պարտվողական այս մոտեցմամբ, տարածքային ցավալի հերթական զիջումներով, ըստ էության, հաչս միջազգային հանրության լեգիտիմացվում են Հայաստանի տարածքների նկատմամբ Ադրբեջանի կեղծ պահանջատիրությունը և դատապարտելի հավակնությունները:

    Եկեղեցին միարժեքորեն ողջունում է խաղաղության հասնելուն ուղղված բոլոր ողջամիտ ջանքերն ու գործընթացները: Անվիճարկելի է, որ միակողմանի զիջումներով «խաղաղության դարաշրջան» կերտելու` Հայաստանի իշխանությունների որդեգրած քաղաքականությունը ոչ միայն անիրատեսական է, այլև աղետաբեր: Հայրենի հողի շուրջ սակարկումները և չարդարացված շարունակական զիջումները երբեք անվտանգային միջավայր չեն կարող ապահովել մեր ժողովրդի համար։

    Տևական ու ամուր խաղաղություն հնարավոր է կերտել ազգային արժանապատվության և իրավունքների հանդեպ լիարժեք հարգանքի դրսևորման և փոխադարձության սկզբունքի պահպանման պայմաններում:

    Կոչ ենք ուղղում ՀՀ իշխանություններին` հրաժարվել պարտվողական գործելաոճից և ծառացած հիմնախնդիրների շուրջ բանակցություններում ընթացք չտալ պարտադրվող այնպիսի լուծումների, որոնք հայրենիքը կկանգնեցնեն անվտանգային նոր մարտահրավերների առջև։

    Կոչ ենք ուղղում նաև Հայաստանի և Սփյուռքի ազգային, քաղաքական, հասարակական կազմակերպություններին, հայրենիքի ապագայով մտահոգ ազգի բոլոր զավակներին` այդ թվում և պետական պաշտոնատար անձանց` համախմբվել և համազգային միասնականությամբ պաշտպանել ազգային-պետական մեր շահերը, ողջ ներուժով ներդրում բերել պետականության ամրապնդման ու բարօր, ապահով գալիքի կերտման գործում։

    Հավատում ենք, որ մեր ժողովրդի մեջ զորեղ է հայրենանվիրումի և անձնականն ի սեր ազգի զոհաբերելու հանձնառության ոգին, ամուր` ազգային ինքնությունը պահպանելու նախանձախնդրությունը, և մենք Հարուցյալ Փրկչի օգնականությամբ ու համընդհանուր ջանքերով ի զորու ենք հեռացնել արհավիրքն ու չարիքը հայրենական մեր կյանքից։

    Սրտաբուխ աղոթքով հայցում ենք Երկնավոր Տիրոջից, որ խաղաղության ու համերաշխության շնորհները հեղի մեր երկրի և ժողովրդի կյանքում և անվտանգ ու անսասան պահի Հայոց անկախ պետականությունը»։

  • «Չի կարելի թույլ տալ ադրբեջանական զինված ծառայողների որևէ ներկայություն մեր բնակավայրերի հարևանությամբ կամ ճանապարհներին». Արման Թաթոյան

    «Չի կարելի թույլ տալ ադրբեջանական զինված ծառայողների որևէ ներկայություն մեր բնակավայրերի հարևանությամբ կամ ճանապարհներին». Արման Թաթոյան

    ՀՀ նախկին ՄԻՊ Արման Թաթոյանը ֆեյսբուքյան իր էջում գրում է․ «Տավուշի մարզի Ազատամուտ, Կայան, Բերքաբեր, Կիրանց, Աճարկուտ, Ոսկեպար, Բաղանիս Այրում և այլ բնակավայրերում, ինչպես նաև միջպետական ճանապարհի նշված բնակավայրերի հատվածներում իրականացրել ենք փաստահավաք աշխատանքներ:

    Ապացույցները ևս մեկ անգամ հաստատում են, որ չի կարելի թույլ տալ ադրբեջանական զինված ծառայողների որևէ ներկայություն մեր բնակավայրերի հարևանությամբ կամ ճանապարհներին: Դա անհնարինության է վերածելու մարդկանց կյանքը, կոպտորեն խախտելու է նրանց իրավունքները և խաթարելու է անվտանգությունը, մեկուսացնելու է բնակավայրեր և լուրջ վնաս է հասցնելու Հայաստանի անվտանգությանը, իսկ սա որևէ առնչություն չունի սահմանների որոշման հետ (դելիմիտացիա կամ սահմանազատում):

    Հավաքագրած փաստերը, ուսումնասիրությունների մանրամասները կներկայացնենք ավելի ուշ»:

  • Չեմ կարծում, որ խոսքը գնում է դելիմիտացիայի մասին. խոսքը գնում է ուղղակի Ադրբեջանի պահանջած տարածքների մասին. քաղաքագետ

    Չեմ կարծում, որ խոսքը գնում է դելիմիտացիայի մասին. խոսքը գնում է ուղղակի Ադրբեջանի պահանջած տարածքների մասին. քաղաքագետ

    Սահմանազատման գործընթացը Տավուշի մարզից սկսելու նախաձեռնությունը (իհարկե չեմ կարծում, որ խոսքը դասական դելիմիտացիայի մասին է) գալիս է Ադրբեջանի կողմից։ Դա հստակ երևում է այդ երկրի փոխվարչապետի հայտարարությունից, որտեղ թվարկված են Տավուշի մարզից ակնկալվող տարածքները, Azg.am-ի թղթակցի հետ զրույցում ասաց քաղաքագետ Դավիթ Հարությունովը։

    Հիշեցնենք, որ ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը երեկ հայտարարել է, որ ՀՀ  ԶՈՒ գլխավոր շտաբն է նպատակահարմար գտել, որ սահմանազատման գործընթացը սկսվի Տավուշից։

    Օրեր առաջ, սակայն, «Քաղաքացիական պայմանագիր» խմբակցության պատգամավոր Արմեն Խաչատրյանն Ազգային ժողովում հայտարարել էր, թե Ադրբեջանն է ցանկացել, որ սահմանազատումը սկսվի Տավուշից, մինչդեռ, փոխվարչապետի գրասենյակից հայտարարել էին՝ սահմանազատումը Տավուշից սկսելու վերաբերյալ որոշում դեռ չկա։

    «Բոլոր պրոցեսներն սկսվեցին ադրբեջանական կողմի հայտարարությունից, որ Տավուշի մարզի 4 գյուղեր պետք է անհապաղ փոխանցվեն Բաքվին։ Ելակետը դա էր. դրա համար էլ կարծում եմ, որ այդ պայմաններում հայկական կողմը ամբողջ պրոցեսն իրականացնում է Ադրբեջանի ճնշման տակ։

    ՀՀ իշխանությունները միաժամանակ գիտեն, որ տարածքներ հանձնելու երևույթը հասարակության շրջանում դժգոհություններ է առաջացնում։ Այս պայմաններում տեղեկատվական դաշտում իրականացվում է մի քանի հնարք, որոնց նպատակն է թուլացնել լարվածությունը։ Հիշեցնեմ, որ դելիմիտացիան Տավուշից սկսելու մասին առաջինը Նիկոլ Փաշինյանն  է հայտարարել։

    Բայց այստեղ որոշակի հակասություն կա, որովհետև, կրկնում եմ, չեմ կարծում, որ խոսքը գնում է դելիմիտացիայի մասին. խոսքը գնում է ուղղակի տարածքների մասին, որոնք Ադրբեջանը պահանջում է, որովհետև հայկական կողմը հայտարարեց, որ դելիմիտացիայի հիմքերը որևէ կերպ համաձայնեցված չեն՝ քարտեզներ, փաստաթղթեր և այլն։ Դելիմիտացիան բավականին երկարատև և մանրակրկիտ աշխատանք է ենթադրում, և հենց ՀՀ փոխվարչապետի գրասենյակից էլ հայտնում են, որ ոչինչ համաձայնեցված չէ»,- նշեց Դավիթ Հարությունովը։

    Քաղաքագետն ուշադրություն հրավիրեց այն հանգամանքի վրա, որ հայկական կողմը Տավուշի մարզից սահմանազատում սկսելու վերաբերյալ հակասական տեղեկատվություն է տարածում՝ քողարկելու զիջումների գնալու իր գործելաոճը։

    «Նաև պատասխանատվության խնդիր կա. ներկայացվում է, որ այս հարցը ոչ թե քաղաքական ղեկավարությունն է կայացրել, այլ Գլխավոր շտաբը, բայց հասկանալի է, որ ԳՇ-ն ենթարկվում է քաղաքական իշխանությանը»,- ամփոփեց մեր զրուցակիցը։

  • Ոչ մի սահմանազատում չի լինելու, Ադրբեջանը Տավուշում ստանալու է այն, ինչ ուզում է , և դրանով ամեն ինչ վերջանալու է. Գագիկ Համբարյան

    Ոչ մի սահմանազատում չի լինելու, Ադրբեջանը Տավուշում ստանալու է այն, ինչ ուզում է , և դրանով ամեն ինչ վերջանալու է. Գագիկ Համբարյան

    Ես հակված եմ հավատալու ՔՊ-ական պատգամավոր Արմեն Խաչատրյանի հայտարարությանը, թե Ադրբեջանն է ցանկացել, որ սահմանազատումը սկսվի Տավուշից։ Azg.am-ի թղթակցի հետ զրույցում այս մասին ասաց քաղաքագետ Գագիկ Համբարյանը՝ իր այս դիրքորշումը բացատրելով նրանով, որ իշխանական գործչի հայտարարության մեջ շատ պարզ տրամաբանություն կա՝ Ադրբեջանի իշխանությունները փորձում են սահմանազատումն սկսել Տավուշի մարզից, որպեսզի Տավուշի մարզով էլ ավարտեն։

    «Որովհետև եթե Տավուշի մարզից իջնենք հարավ, Ադրբեջանն, ըստ տրամաբանության, պետք է Հայաստանին հետ վերադարձնի Արցախյան առաջին պատերազմի ընթացքում գրաված բոլոր տարածքները, այդ թվում՝ նաև Տավուշի մարզից։ Ի դեպ՝ Տավուշի մարզից Ադրբեջանը բավական մեծ տարածքներ է գրավել։ Հետո, հարավում Արծվաշենն է, ավելի ներքև՝ արդեն Գեղարքունիքի, Վայոց ձորի և Սյունիքի մարզերը, որոնց շատ տարածքներ մենք կորցրել ենք Նիկոլ Փաշինյանի կառավարման տարիներին՝ Սոթք, Խոզնավար, Իշխանասար, Սև լիճ, Ներքին Հանդ և Տեղ գյուղի հատվածներ»,- նշեց Գագիկ Համբարյանը։

    Քաղաքագետի խոսքով՝ Ադրբեջանը հայաստանյան հասարակությանը շատ պարզ հասկացնում է, որ սահմանազատման արդյունքում ինքը ստանալու է այն, ինչ ուզում է, այն է՝ Տավուշի մարզի 8 գյուղերից 7-ը և փոխադարձաբար Հայաստանին ոչինչ չի տալու։

    «Ադրբեջանն այս առումով շատ անկեղծ է։ Այս գործընթացը սահմանազատում անվանելը հնարել են Փաշինյանն ու նրան սպասարկողները։ Ոչ մի սահմանազատում չի լինելու։ Ադրբեջանն ստանալու է այն, ինչ ուզում է , և դրանով ամեն ինչ վերջանալու է։ Իշխանության ներկայացուցիչների այն ամբողջ զազրախոսությունը և զառանցանքը, թե Ադրբեջանն էլ իբր մեզ է ինչ-որ բաներ տալու, ծոծրակները կտեսնեն՝ դա չեն տեսնի։ Բաքվի բռնապետը բազմաթիվ հարցազրույցներում շատ պարզ նշել է, որ Ադրբեջանը Հայաստանին տալու ոչինչ չունի և չի տալու։

    Ինքնախաբեությամբ զբաղվող, թուրքերի շահերը սպասարկող կապիտուլյանտ Նիկոլ Փաշինյանն ընդամենը զբաղված է զազրախոսությամբ։ Ցավով պետք է արձանագրենք, որ Ալիևը ճիշտ է ասում. Հայաստանի և Ադրբեջանի միջև տարածքային ամբողջականություն փոխադարձաբար ճանաչված չէ։

    Նիկոլ Փաշինյանի բոլոր հայտարարությունները, թե իբր Հայաստանի Հանրապետությունը 1991 թվականի դեկտեմբերի 21-ի Ալմաթայի դեկլարացիայով ճանաչել է Ադրբեջանի տարածքային ամբողջականությունը, բացահայտ կեղծիք է։ Հայաստանն այդ դեկլարացիան ընդունել է 10 վերապահումներով։ Դրանցից երկուսը հետևյալն են՝ Հայաստանի Հանրապետությունը չի ճանաչում խորհրդային Ադրբեջանի և խորհրդային Հայաստանի միջև գոյություն ունեցած վարչական սահմանները՝ որպես պետական սահման, և երկրորդ՝ Հայաստանի Հանրապետությունը չի ճանաչում Լեռնային Ղարաբաղը՝ որպես Ադրբեջանի մաս»,- շեշտեց Գագիկ Համբարյանը։

    Ամփոփելով՝ քաղաքագետը նկատեց՝ Ադրբեջանը, օգտվելով ՀՀ իշխանությունների՝ ներքին լսարանին խաբելու գործողությունից, մեկ կրակոցով երկու նապաստակ է սպանում. նախ, Հայաստանի Հանրապետությունը լեգիտիմացնում է Հայաստանի դեմ Ադրբեջանի բոլոր ագրեսիվ քայլերը, երկրորդ՝ Նիկոլ Փաշինյանն ուղղակի տարածքներ է նվիրում Ադրբեջանին։

    «Ինչ վերաբերում է ԳՇ կամ փոխվաչապետ Մհեր Գրիգորյանի գրասենյակի հայտարարութւյուններին, դրանք բոլորը կեղծիք և մանիպուլյացիա են։ ՔՊ-ական պատգամավոր Արմեն Խաչատրյանն ավելի անկեղծ է եղել, և այո՛ հենց Ադրբեջանն է պահանջում սահմանազատումը կազմակերպել Տավուշի մարզից, որպեսզի այդ գյուղերը ստանա»,- ամփոփեց Գագիկ Համբարյանը։

    Հիշեցնենք, որ ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը երեկ հայտարարել է, որ ՀՀ  ԶՈՒ գլխավոր շտաբն է նպատակահարմար գտել, որ սահմանազատման գործընթացը սկսվի Տավուշից։

    Օրեր առաջ, սակայն, «Քաղաքացիական պայմանագիր» խմբակցության պատգամավոր Արմեն Խաչատրյանն Ազգային ժողովում հայտարարել էր, թե Ադրբեջանն է ցանկացել, որ սահմանազատումը սկսվի Տավուշից, մինչդեռ, փոխվարչապետի գրասենյակից հայտարարել էին՝ սահմանազատումը Տավուշից սկսելու վերաբերյալ որոշում դեռ չկա։

  • Հայաստանը սկսել է միջպետական ​​ճանապարհների երկայնքով գտնվող կառույցների գույքագրումը

    Հայաստանը սկսել է միջպետական ​​ճանապարհների երկայնքով գտնվող կառույցների գույքագրումը

    Հայաստանի տարածքային կառավարման և ենթակառուցվածքների նախարարությունը սկսել է միջպետական ​​ճանապարհների երկայնքով գտնվող կառույցների և հողատարածքների գույքագրումը։ Այս մասին ապրիլի 9-ին Ազգային ժողովի նիստում ասել է վարչության պետի տեղակալ Քրիստինե Գալեչյանը։

    Աշխատանքները, ըստ նրա, սկսվել են Արմավիրի մարզում գտնվող տարածքներից։ «Գույքագրման շրջանակներում հատուկ ուշադրություն է դարձվելու կառույցների, նշանների և կայանատեղերի բացահայտմանը, որոնք խոչընդոտում են երթևեկությանը կամ պարզապես սահմանափակում են տեսանելությունը ճանապարհներին», – նշել է Գալեչյանը։

    Ինչպես նշեց փոխնախարարը, ստուգման արդյունքներով վարչությունը կկայացնի համապատասխան որոշումներ, այդ թվում՝ վերը նշված շենքերի հնարավոր ապամոնտաժման մասին։ «Դժվարությունն այն է, որ ճանապարհների երկայնքով տարածքները չեն կարող վաճառվել կամ մշակվել առանց նախարարության հավանության: Սակայն այս պահանջը տարիների ընթացքում բազմիցս խախտվել է։ Ներկայումս ապօրինի շինարարության փաստերի առնչությամբ ընթանում են դատավարություններ»,- պարզաբանեց կառավարության ներկայացուցիչը։

    Բացի այդ, նա հավելել է, որ ճանապարհային գծանշումները կհամապատասխանեցվեն ԵԱՏՄ չափանիշներին։ Այսինքն՝ այն պետք է թարմացվի առնվազն տարին երկու անգամ։ Այժմ, խոստովանեց պաշտոնյան, այն հաճախ գրեթե ամբողջությամբ ջնջվում է։ Եվ նույնիսկ մինչև նրանք ժամանակ ունենան նոր ներկ կիրառելու համար:

  • ԼՂ-ում մնացած մոտ 10 հայերն այժմ ենթարկվում են հալածանքների. Մարուքյան

    Հենց սա էլ մենք անվանել ենք ադրբեջանական ռեժիմի դեմք և դրա հիման վրա անընդհատ պնդել ենք, որ այն ի վիճակի չէ ապահովելու Լեռնային Ղարաբաղի հայերի իրավունքներն ու անվտանգության երաշխիքները. X-ի իր էջում գրել է ՀՀ հատուկ հանձնարարություններով նախկին դեսպան, ԼՀԿ նախագահ Էդմոն Մարուքյանը։

    Նա տեսանյութ է հրապարակել, թե ինչպես են ադրբեջանցիները ծաղրում Արցախում մնացած տարեց տղամարդուն։

    «Ադրբեջանի՝ էթնիկ զտումներ իրականացնելուց հետո, ԼՂ-ում 150 հազար հայերից մնացին մոտ 10-ը, որոնք այժմ ենթարկվում են հալածանքների։ Ահա թե ինչու մենք շարունակեցինք ասել, որ սա հանցավոր ռեժիմ է և դեռ զարմանում ենք, թե ինչպես կարող է միջազգային հանրությունը հավատալ Ադրբեջանին, երբ նրանք ասում էին. «Նրանք մեր քաղաքացիներն են և ունեն բոլոր իրավունքներն ու անվտանգությունը՝ համաձայն Ադրբեջանի Սահմանադրության՝ մեզ հետ խաղաղ ապրելու համար»»,-գրել է նա։

    Մարուքյանը հարց է ուղղել Եվրոպական խորհրդի ղեկավար Շառլ Միշելին, թե ի՞նչ է մտածում այդ մասին։

  • Բայց, արդյո՞ք չենք ուշացել կամ ուշանում. Դավիթ Անանյան

    Բայց, արդյո՞ք չենք ուշացել կամ ուշանում. Դավիթ Անանյան

    Այն պահից ի վեր, երբ օրացույցի էջը փոխվեց 2020 թվականի նոյեմբերի 9-ին, մեր ազգը, մեր հասարակությունը ընկղմվեց կյանքի արտասովոր ռիթմի մեջ, մի ռիթմ, որը պարբերաբար սկսեց ստուգման ենթարկել մեր պետականության հիմքերը և սոցիալական ներդաշնակությունը: Այս մասին գրել է ՊԵԿ նախկին նախագահ Դավիթ Անանյանը։

    Նրա խոսքով, չնայած բոլոր դրամատիկ շրջադարձներին, մենք իրավաբանորեն այդպես էլ չձևակերպեցինք առկա իրավիճակն ու դրությունը այս ժամանակահատվածում որպես արտակարգ:

    «Ամբողջ աշխարհում ճգնաժամային կառավարումը ներառում է հատուկ կանոնների և գործիքակազմի կիրառում, որոնք նախատեսված են իրավիճակը կայունացնելու և ժողովրդին ու պետությանը փակուղուց դուրս բերելու համար: Արտակարգ դրության պայմաններում ճգնաժամի հաղթահարման առանցքային կետը ազգային միասնության հասնելու հնարավորությունն է, երբ պետությունն ու հասարակությունը միավորվում են հանուն ընդհանուր բարօրության։

    Այնինչ անցած չորս տարիների ընթացքում մենք ոչինչ չարեցինք, առավելագույնը՝ սովորեցինք մեզ պահել սեփական պատրանքների ստվերում՝ համոզելով ինքներս մեզ, որ ի վիճակի ենք շարունակել կյանքը սովորականի պես՝ պահպանելով պետականության գոյության պատրանքը՝ դրա գործնական ատրիբուտների չգոյության  ապացույցներն անտեսելով:

    Ազգային առաջնորդության բացակայությունն է, որ խաթարում է ընթացքը շտկելու մեր բոլոր փորձերը՝ թողնելով մեզ նավարկելու անորոշության ջրերում՝ առանց հստակ ուղղության: Մենք ականատես ենք լինում, որ քայլ առ քայլ կորցնում ենք մեր էության, մեր ինքնության ամենակարևոր բաղադրիչները, և կորուստները տեղի են ունենում այնքան դանդաղ ու աննկատ, որ ցավը կարծես թե չենք էլ զգում, չենք գիտակցում կորստի մասշտաբները, ասես զգացմունքային թմրություն մեջ ենք:

    Այս դրամատիկ պատկերի համընդհանուր գիտակցմանը հետևելու է դրանից օտարման կոչին արձագանքելն ու մեր ազգային ինքնությունը վերականգնելու և ազգային իրական արժեքներին վերադառնալու անհրաժեշտության գիտակցումը: Բայց, արդյո՞ք չենք ուշացել կամ ուշանում…»,-գրել  է նա։

  • Ադրբեջանը կրակ է բացել Սյունիքում Արավուսի և Խոզնավարի հատվածում հայկական դիրքերի ուղղությամբ. ՀՀ ՊՆ

    Ադրբեջանը կրակ է բացել Սյունիքում Արավուսի և Խոզնավարի հատվածում հայկական դիրքերի ուղղությամբ. ՀՀ ՊՆ

    Ադրբեջանի ՊՆ հաղորդագրությունը, թե իբր ապրիլի 8-ին՝ ժամը 23։35-23։45-ն ընկած ժամանակահատվածում, ՀՀ ԶՈՒ ստորաբաժանումները կրակ են բացել սահմանագոտու հարավարևելյան հատվածում տեղակայված ադրբեջանական դիրքերի ուղղությամբ, չի համապատասխանում իրականությանը։

    Միևնույն ժամանակ Հայաստանի Հանրապետության պաշտպանության նախարարությունը հայտնում է, որ Ադրբեջանի ԶՈՒ ստորաբաժանումներն ապրիլի 8-ին՝ ժամը 22:50-ին, Արավուսի (Սյունիքի մարզ), ժամը 22:55-ին Խոզնավարի (Սյունիքի մարզ) հատվածում կրակ են բացել ՀՀ ԶՈՒ դիրքերի ուղղությամբ:

  • Չեմ բացառում, որ Ադրբեջանը լայնածավալ հարձակման գնա. Արմեն Ռուստամյան

    Չեմ բացառում, որ Ադրբեջանը լայնածավալ հարձակման գնա. Արմեն Ռուստամյան

    Ազգային ժողովի ընդդիմադիր  «Հայաստան» խմբակցության պատգամավոր Արմեն Ռուստամյանը չի բացառում, որ Ադրբեջանը գնա Հայաստանի դեմ լայնամասշտաբ հարձակման: Այս մասին նա նշեց այսօր՝ ապրիլի 9-ին, ԱԺ-ում լրագրողների հետ զրույցում:

    «Եթե էսկալացիայի վտանգ չկա` ինչո՞ւ է իշխանությունը վախեցնում մեր ժողովրդին պատերազմով։ Վերջերս Նիկոլ Փաշինյանն այցելել էր սահմանամերձ գոտի, որտեղ պատրաստվում են տարածքներ հանձնել, ահաբեկել էր պատերազմով: Եթե որևէ վտանգ չկա` պետք  չէ ժողովրդին վախեցնել,  բայց, իրականում, դա այդպես չէ։ Սա շատ հստակ ծրագրված գործընթաց է. այնտեղից վախեցնում են, այստեղից վախեցնում են ու ստեղծում տպավորություն, որ  ուրիշ ճանապարհ չունենք, պետք է զիջենք, որ կարողանանք գոյատևել», – ասաց նա:

    Ըստ նրա`  բանավոր խոսակցությունները զուգորդվում են սահմանային լարվածություններով, որ  Ադրբեջանն ու Թուրքիան ստանան իրենց համար ընդունելի արդյունքներ ու հասնեն իրենց նպատակին:

    Պատգամավորը գիտի, թե որքան պետք է զիջել Ադրբեջանին, որ բավարարեն նրա պահանջները. «Մինչև  հայկական ինքնության վերացումը,  մինչև հայկական գործոնի վերացումը ու Հայաստանի վերածումը «Արևմտյան Ադրբեջանի»: Բնականաբար,  այս ընթացքն իրականացվում է այս ահաբեկչական մթնոլորտը ստեղծելով, մենք  էլ ասում ենք` թույլ ենք, անկարող ենք: Ես չեմ բացառում, որ Ադրբեջանն այս անգամ նաև լայնածավալ հարձակման գնա, որ միանգամից խնդիրը լուծի: Լոկալ բախումների ընթացքում Ադրբեջանը միշտ հասել է ինչ-որ լոկալ արդյունքների, բայց այս անգամ, կարծում եմ, որ իրենց խնդիրն ավելի գլոբալ է»,-ասաց Ռուստամյանը:

    Նա ասաց՝ երբ Հայաստանից ասվում է, որ այդ տարածքներն իրենցն են, դրանով նրանց հրավիրում ենք այդ տարածքներ մտնել, այդ թվում՝ նաև զորքով:

    Արմեն Ռուստամյանը հայտարարեց, որ Թուրքիայի ու Ադրբեջանի նպատակն է Հայաստանը բերել այն վիճակի, որ որևէ կարողություն անգամ չունենա` պաշտպանելու իր նվազագույն  շահերը:

    «Նրանք հստակ ծրագիր են դրել՝ չեզոքացնել հայկական գործոնը տարածաշրջանում»,- հավելեց պատգամավորը:

    Հիշեցնենք, որ Ադրբեջանի ԶՈՒ ստորաբաժանումները վերջին օրերին սահմանագոտու մի շարք ուղղություններում տարբեր տրամաչափի հրաձգային զենքերից փոփոխական ինտենսիվությամբ կրակ են բացել ՀՀ ԶՈՒ դիրքերի ուղղությամբ: