Ներողություն եմ խնդրում հանրությունից այս արդյունքի համար. Թբիլիսիի «Դինամո Արենայում» լրագրողների հետ ճեպազրույցում ասաց Հայաստանի ֆուտբոլի Ֆեդերացիայի նախագահ Արմեն Մելիքբեկյանը:
Ֆուտբոլի Հայաստանի հավաքականի նորանշանակ մարզիչ Ջոն վան’տ Սխիպի հետխաղային ասուլիսից եւ ներողությունից հետո, ՀՖՖ նախագահ Արմեն Մելիքբեյանը, հավաքականի ավագ Վարազդատ Հարոյանը եւ Ջոն վան’տ Սխիպը համատեղ հայտարարությամբ հանդես եկան:
«Խաղից հետո բավականին երկար շփվեցինք թիմում ֆեդերացիայի ներկայացուցիչների, ֆուտբոլիստների եւ մարզիչների հետ: Երկար եւ լուրջ խոսակցություն ունեցանք եւ եկանք այն եզրակացության, որ պատրաստ ենք ընդունել այս մարտահրավերը։ Համոզված եմ, որ որպես մի թիմ կարող ենք առաջ գնալ։ Ներողություն եմ խնդրում հանրությունից այս արդյունքի համար: Երկար զրույցից հետո եկել ենք այն որոշմանը, որ կարող ենք որպես մեկ թիմ առաջ գնալ, անկախ այն նեգատիվից, որը կա հայկական ֆուտբոլում:
Պատրաստ ենք հաղթահարել այդ ամենը, այդ դժվարությունները, փորձել այդ խնդիրները մեր ներսում լուծել եւ հունիսին ներկայանալ միանգամայն այլ վիճակում, փորձել ամեն ինչ անել, որ կազմ ու պատրաստ, որպես բավականին մարտունակ թիմ ներկայանալ սեպտեմբերին աշխարհի առաջնության ընտրական փուլին:
Սա համատեղ հայտարարություն է ֆեդերացիայի, մարզչական շտաբի եւ ֆուտբոլիստների կողմից: Սա երկար զրույցի արդյունք է»,- ասաց Արմեն Մելիքբեկյանը:
Ազգերի լիգայի B ուղեգրի համար անցումային փլեյ-օֆֆում Հայաստանի հավաքականը երկու հանդիպումներում էլ պարտվել է Վրաստանի թիմին (0:3, 1:6):
