Ի պատասխան Բերձորի ճանապարհի շուրջ ստեղծված իրավիճակի վերաբերյալ Եվրոպայի խորհրդի Մարդու իրավունքների հանձնակատար Դունյա Միյատովիչի կոչին՝ Ադրբեջանի արտաքին գործերի նախարարությունը հանդես է եկել հայտարարությամբ, որում նշվում է՝ հանձնակատարի հայտարարությունը «կողմնակալ» է և «տեղում առկա իրողությունները չի արտացոլում»։
«Ապրանքների մատակարարման կամ անհրաժեշտ բժշկական ծառայությունների մատուցման համար խոչընդոտներ չկան։ Փաստ է, որ վերջին օրերին մի քանի մեքենա, այդ թվում՝ ռուս խաղաղապահների, Կարմիր Խաչի միջազգային կոմիտեի, ինչպես նաև հայկական շտապօգնության մեքենաներ, անարգել անցել են Լաչինի ճանապարհով», – ասված է Ադրբեջանի ԱԳՆ-ի հայտարարության մեջ։
«Այսպիսով, Եվրախորհրդի հանձնակատարը ևս մեկ անգամ կասկածի տակ դրեց իր աշխատանքի անաչառությունը։ Բացի այդ, հանձնակատարի հայտարարությունը չի նպաստում տարածաշրջանում խաղաղությանը»,- հայտարարել է Ադրբեջանի ԱԳՆ-ը։
Ադրբեջանի ԱԳՆ-ն խորհուրդ է տվել հանձնակատարին լինել անաչառ, ինչպես պահանջում է նրա մանդատը, և «ձեռնպահ մնալ այնպիսի գործողություններից ու հայտարարություններից, որոնք կարող են վնասել Եվրոպայի խորհրդի հեղինակությանը»:
