Հավատացե՛ք, ուրախ կլինեմ, որ պետական բոլոր մանկապարտեզներում տեսախցիկներ տեղադրվեն, Azg.am-ի թղթակցի հետ զրույցում ասաց Երևանի թիվ 58 մսուր-մանկապարտեզ ՀՈԱԿ-ի տնօրենի ժամանակավոր պաշտոնակատար Լիլիթ Վարաժյանը՝ անդրադառնալով Երևանի քաղաքապետ Տիգրան Ավինյանի հանձնարարականին՝ քաղաքապետարանին կից գործող բոլոր մանկապարտեզներում տեսախցիկներ տեղադրել։
«Մեր մանկապարտեզը վերանորոգվել է, բայց վերանորոգումից հետո այդ հարցը չի կարգավորվել։ Բայց իմ՝ ՀՈԱԿ-ի տնօրենի ժ/պ նշանակվելուց հետո առաջինը որ մտածել եմ, տեսախցիկների հարցը կարգավորելն է եղել։ Սակայն ավելի հրատապ խնդիրներ ունեինք. հերթը տեսախցիկներին չհասավ։ Բայց ես միայն ուրախ կլինեմ, եթե նման նախաձեռնությանը կյանք տրվի։ Այնպես որ, մանկապարտեզներում տեսախցիկներ տեղադրելուն միանշանակ համաձայն եմ»,- ասաց մեր զրուցակիցը։
Լիլիթ Վարաժյանը միաժամանակ նշեց, որ իր ենթակաների հետ ոչ մի անգամ չի քննարկել տեսախցիկներ տեղադրելու թեման և չի իմացել այդ հարցի շուրջ նրանց կարծիքը, սակայն արդեն երկու ամիս միասին աշխատելով՝ տեսել է անձնակազմի բարեխիղճ աշխատանքը և սաների նկատմամբ լավ վերաբերմունքը. այժմ վստահ է՝ նրանցից ոչ ոք այս նորամուծությանը դեմ չի լինի։
«Մեր մասնագետները շատ բարեխիղճ են աշխատում։ Չեմ կարծում՝ իրենք այս առումով մտահոգություն կունենան։ Տեսախցիկների տեղադրումն ի վերջո նրանց աշխատանքը թափանցիկ ու ճիշտ ներկայացնելու հնարավորություն կտա։ Որովհետև հաճախ լինում են դեպքեր, երբ թյուրըմբռնում է լինում, իսկ դայակներն ու դաստիարակներն տեսախցիկներ լինելու պարագայում միանշանակ ապահովագրված են լինելու։
Ես որպես հաստատության ղեկավար՝ կարծում եմ, որ տեսախցիկների տեղադրումը մեզ կապահովագրի շատ թյուր կարծիքներից և մեկնաբանություններից։ Ամեն դեպքում, սպասենք նախաձեռնությանը. կարծում եմ՝ դեռևս քննարկումներ կլինեն, բայց ես, կրկնում եմ, դա ավելի կհեշտացնի և կթեթևացնի մեր աշխատանքը»,- նշեց Լիլիթ Վարաժյանը՝ միաժամանակ հավաստիացնելով, որ իր պաշտոնավարման երկու ամսվա ընթացքում որևէ ծնող չի մոտեցել և չի բողոքել մանկավարժական կոլեկտիվի հնարավոր վատ վերաբերմունքից։
Հիշեցնենք, որ Երևանի քաղաքապետ Տիգրան Ավինյանն այսօր՝ քաղաքապետարանի գործակարգավորական նիստի ընթացքում, հանձնարարական տվեց Երևանի քաղաքապետարանին կից գործող բոլոր մանկապարտեզներում տեղադրել տեսախցիկներ։
«Բոլոր մանկապարտեզները պետք է հագեցած լինեն տեսախցիկներով, որոնք պետք է ունենան հասանելիություն մի քանի անձի, ովքեր այդ վերահսկողությունը պետք է իրականացնեն։ Քաղաքապետարանում պետք է համոզված լինեն, որ մանկապարտեզներում մենք ունենք երեխաների համար բարենպաստ միջավայր», – ասաց Ավինյանը։
