Գավառում ստեղծվել է տեսակով առաջին հիբրիդային գրադարանը։ Այն Գեղարքունիքի մարզի ոչ պետական, ամենախոշոր հանրային գրադարանն է, որի ֆոնդը ձեւավորվել է տեղի բնակիչների անձնական գրադարանների, ինչպես նաեւ կրթական եւ ուսումնական հիմնարկությունների նվիրատվությունների հիման վրա։ Իբրեւ Գեղարքունիքում առաջին ուղեղային կենտրոն , «Բայազետը» ստեղծում է անհրաժեշտ պայմաններ գրքերի հավաքագրման, պահպանման, ինչպես նաեւ որպես գիտակրթական հասարակական կազմակերպություն՝ ընթերցողներին բոլոր հնարավոր ուղիներով հասանելի դարձնելու համար։
Ի սկզբանե «Բայազետ» վերլուծական-հետազորտական հայկական կենտրոնի որդեգած 3 ուղղություններին՝ հետազոտություն, իրազեկում, ոչ ֆորմալ կրթություն, ավելացավ եւս մեկը ՝ գրադարանագիտական աշխատանքը։ «Գրադարանի ստեցղծման միտքը եղել է դեռեւս ՀԿ-ի հիմնադրման օրվանից: Ներկայիս առկա գրաֆոնդում ունենք հին, նոր ու ժամանակակից գրականություն, պահանջված մասնագիտական գրականություն։ Գրադարանը համալրված է արտասահմանյան գրականությամբ», ասում է կենտրոնի գլխավոր քարտուղարի օգնական Անի Թադեւոսյանը, հավելելով, որ կենտրոնը բաց է գրադարանագիտական աշխատանքներում համագործակցության համար.«Հաճախ ենք գրքի քննարկումներ ունենում, դրանք նպաստում են երիտասարդների հզորացմանը եւ գիտական մտքի զարգացմանը»։ Գրադարանը նպատակ ունի խթանելու մարզի ինտելեկտուալ ներուժի զարգացմանը։ Այն իր ներուժը ծառայեցնում է ոչ միայն մարզում, այլեւ մարզից դուրս, այդ իսկ պատճառով գրքերը հավաքագրելուց հետո սկսվել է մարզում առաջին անգամ գրքերի թվայնացման գործընթացքը։
«Այս գրադարանի որդեգրած քաղաքականությունը տարբերվում է իր նորարարական լուծումներով։ Մենք թվայնացնում ենք գրադարանը եւ գրքերը տեղադրում «Բայազետ»-ի կայքէջում, որը հասանելի է բոլորին։ Կայքէջը թույլ է տալիս մարդկանց տեսնել՝ ունե՞նք այդ պահին իրենց նախընտրած գիրքը, կատարել օնլայն ամրագրում եւ իրենց նախընտրած օրն ու ժամին մոտենալ ու վերցել», պատմում է Անին։
«Բայազետ»-ի գրադարանը համալրվում է նաեւ կենտրոնի կողմից կատարվող հետազոտական-վերլուծական աշխատանքներով եւ թարգամանություններով։ Այս պահին 3 հետազոտություն եւ 5 լեզուներից թարգամանված 30 հոդված տեղ են գտել գրադարանում։ «Բայազետ»-ը հայ ընթերցողի դատին է ներկայացրել «Բայազետ»-ի ընտրանի 2022» թարգմանությունների ժողովածուն, որը բանասիրության, լեզվագիտության, ինչպես նաեւ սոցիալական-գիտությունների տեսանկյունից արժեքավոր աշխատություն է։
Ժողովածուում տեղ գտած հեղինակներից շատերը ներկայացվում են հայերենով առաջին անգամ: Աշխատանքն ուղղված է օտար լեզուներ եւ սոցիալական գիտություններ ուսումնասիրողներին, մասնագետներին, ուսանողներին, ընթերցասեր հանրության լայն շրջանակներին։
Այս պահի դրությամբ գրադարանն ունի 6950 միավոր գիրք եւ 63 ակտիվ ընթերցող։ Ամենապահանջվածը երիտասարդների կողմից ժամանակակից գրականությունն է։
«Թվայնացումը ընթերցողների պահանջն է. նրանք օգտվում են այն գրադարաններից, որոնք հագեցած են նոր տեխնոլոգիաներով եւ համապատասխանում են միջազգային ստանդարտներին», նշեց Անին։
ՄԱՐԻՆԵ ԴՎՈՅԱՆ
ՀՊՄՀ Ռադիոհեռուստատեսության 3-րդ կուրսի ուսանողուհի
