Տրանսպորտային պարկի թարմացումը թվում էր, թե բարելավելու է ուղևորափոխադրման անմխիթար վիճակը, բայց կանգառներում շարունակվում են մարդկանց կուտակումները, ու մեծ ավտոբուսներն անգամ չեն փրկում։ Մարդիկ շարունակում են խցկված ճանապարհ գնալ, իսկ օրվա պիկ ժամերին նույնիսկ չեն կարողանում ոտք դնել ավտոբուս։ Վիճակն այսպիսին էր դեռ «բարեփոխումներից» առաջ։ Ցավոք, քաղաքակիրթ ուղևորափոխադրման խնդիրը ոչ միայն չլուծվեց, այլև խցանումներն ավելի հաճախակի դարձան: Փոխանակ բոլոր խնդիրների մանրամասն ծրագրված լուծումներ առաջարկվեն, որոնցով ե՛ւ երթուղիների, ե՛ւ փոխադրումների ողջամիտ հաշվարկված եւ փուլ առ փուլ իրականացվող համակարգ կներդրվի, քաղաքային իշխանությունը նախ փոխադրավարձն է թանկացնում՝ գլխավոր լուծումը համարելով ոչ թե ուղեւորին արժանապատիվ սպասարկում առաջարկելը, այլ խցանումների մեջ մնալու, կանգառներում տրանսպորտին երկար սպասելու և խցկված տեղափոխվելու համար նրանից աներեւակայելի բարձր վճար գանձելը:
Միասնական տոմսային համակարգի լրամշակված նախագծով նախատեսվում է 30 օրվա համար վճարել 8800 դրամ, 90 օրվա համար՝ 23 600 դրամ, 365 օրվա համար՝ 88 000 դրամ՝ բոլոր տարբերակները նշված ժամանակահատվածում անսահմանափակ երթևեկելու հնարավորություն են տալիս։ Ցանկացած փաթեթ ձեռք բերելու դեպքում քաղաքացիները կարող են օգտվել հասարակական տրանսպորտի բոլոր միջոցներից։ Ուսանողների կամ բնակչության հատուկ խմբերի համար կկիրառվեն զեղչեր։
Ի՞նչ սակագներ են գործում այլ քաղաքներում:
Չեխիայի մայրաքաղաք Պրահայում հնարավոր է 64 հազար դրամին համարժեք կրոնով ձեռք բերել մեկ տարվա երթևեկության տոմս. ինչպես տեսնում ենք՝ անհամեմատ էժան, քան Երևանում։
Թբիլիսիում նույն տոմսը 100 դոլարից էլ պակաս գին ունի. 40 լարիով ՝ 6 հազար դրամով էլ հնարավոր է ամսականը ձեռք բերել։
Շրջանառվող նախագիծը մեծ աղմուկ է բարձրացրել, ընդդիմադիրները հիշեցնում են՝ նույն պաշտոնյաները տարիներ առաջ պայքարում էին տրանսպորտի՝ ընդամենը 50 դրամ թանկացման դեմ։ Առաջարկվող սակագները երևանցիներից շատերին է զայրացրել: Քաղաքապետարանը սակագների բարձրացումը կապում է տրանսպորտային բարեփոխումների հետ. նախագիծը ներկայացրել են այն հաշվարկով , որ մինչև սեպտեմբեր եւս 171 ավտոբուս են ձեռք բերելու։
«Եթե դուք նկատի ունեք՝ արդյոք էականորեն իրավիճակը բարելավվելու ա 171 նոր ավտոբուսների գալու դեպքում՝ համեմատ էսօրվա, այո, խոստանում եմ, որ էականորեն բարելավվելու է: Հիմա կարող ա սեպտեմբերի 1-ով չլինի ժամկետը, մի քիչ թեկուզ օբյեկտիվ պայմաններով ավտոբուսները ուշ հասնեն, որովհետև երբեմն եթե շուտ են հասնում, ուրեմն երբեմն ավելի ուշ էլ կարան հասնեն, էդ ժամանակ, ես վստահ եմ, էս որոշման ուժի մեջ մտնելն էլ կարծում եմ կերկարաձգվի: Այսինքն՝ էական բարելավում կլինի՞, այո, կլինի՞ իդեալական վիճակ՝ ոչ, ու չի լինի երբեք, որովհետև իդեալական վիճակ երբեք չի լինում», – հայտարարեց Երեւանի փոխքաղաքապետ Սուրեն Գրիգորյանը:
Թեեւ նախագիծը միայն համայնքապատկան ավտոբուսներին է վերաբերում, բայց սակագները կգործեն նաեւ մետրոյի ու տրոլեյբուսների համար։
Եւ վերջում մի նկատառում, որն անտեսել են ամսական, տարեկան սակագներ նախատեսողները. եթե մարդը շաբաթը երկու անգամ է գնում աշխատանքի, իսկ մնացյալ օրերին տնից է աշխատում, այսինքն՝ մոտ երկու հազար դրամ է ծախսում տրանսպորտի վրա, ինչո՞ւ պետք է որպես ամսավճար՝ մի քանի անգամ ավելի վճարի, ինչո՞ւ հնարավոր չէ սահմանել միասնական քարտ, որն ուղեւորը կլիցքավորի որքան կցանկանա՝ մինչեւ քարտի մեջ եղած գումարի սպառվելը:
Անաստասիա Միրզախանյան
ՀՊՄՀ լրագրության բաժնի ուսանողուհի
