Ավինյանն այսօր առավոտյան որոշել է ինքնակամ շինությունները քանդել. քանդող բրիգադն էլ անմիջապես գործի է անցել

Այսօր առավոտյան քաղաքապետ Տիգրան Ավինյանը որոշում է կայացրել Նոր Նորքի Գայի պողոտայի սկզբնամասում գտնվող բնակելի ինքնակամ շինությունները քանդել։ Առանց բնակիչներին տեղյակ պահելու, քաղաքապետարանի քանդող բրիգադն անցել է գործի։

Տեղում են եղել նաև պաշտոնյաներ։ Նրանք տեղեկացրել են. «Քաղաքապետի քանդման որոշում ունենք: Քաղաքացիների կողմից ապօրինի զավթված այս տարածքում նախկինում եղել է այգի: Քաղաքապետի որոշման հիման վրա այս ամենը քանդվելու է, դառնալու է այգի, անտառ։

Ի՞նչ այլընտրանք է առաջարկվում տասնամյակներով այդտեղ ապրող մարդկանց, պաշտոնյան ասել է, որ այլընտրանք չկա։ Տարածքում կա առանձնատուն, որը չի քանդվելու, թե ինչու է այն կանգուն մնալու, իսկ մյուս տները քանդվում են, պաշտոնյան պատասխան չուներ։  

Ավագանու ընդդիմադիր անդամները նույնպես դեպքի վայրում են եղել։
«Մայր Հայաստան» խմբակցության ավագանու անդամ Մեսրոպ Մանուկյանը պահանջել է, որպեսզի  քաղաքապետի քանդման մասին գրավոր որոշումը ներկայացվի։

Երկար մերժումից հետո որոշումը վերջապես ներկայացվեց։

«Նախ որոշումն այսօր է կայացվել, երեւի րոպեներ առաջ, ֆիքսենք, որ էս մարդիկ, որ առավոտ շուտ եկել են, միգուցե որոշումը չեն էլ ունեցել»: Իզաբելլա Աբգարյանն էլ շարունակեց, թե իրավական մոտեցում չէ, որոշումն այսօր ընդունել ու բնակիչներին չծանուցել:

Մանուկյանը շարունակեց որոշման ընթերցանությունը. «Այս որոշման մեջ բառացի կարդում եմ, որ վարչական վարույթի ընթացքում լսումներ չեն անցկացվել, այսինքն` ժողովրդին բանի տեղ չեն դրել»:

«Ազգային առաջընթաց»-ից Իզաբելլա Աբգարյանն էլ հավելեց, որ ավագանու  քննարկվում չի անցկացվել։