Այսօր Ադրբեջանի դրոշով երթևեկող քաղաքացու նկատմամբ վարչական իրավախախտման արձանագրություն է կազմվել. Factor TV-ին հայտնել են են ՆԳՆ ոստիկանության լրատվական ծառայությունից:
Հարցին, թե ինչ հոդվածով է կազմվել արձանագրությունը, Ոստիկանությունից հրաժարվեցին պատասխանել:
Այնուամենայնիվ, հայտնի է դարձել, որ արձանագրությունը կազմվել է Վարչական իրավախախտումների վերաբերյալ օրենսգրքի 123.5 հոդվածով, այսինքն՝ տրանսպորտային միջոցների հաշվառման համարանիշի օգտագործման կանոնները խախտելը:
Տվյալ դեպքում վարորդին վերագրվող իրավախախտումը անընթեռնելի հաշվառման համարանիշով մեքենա վարելն է:
Թե ինչ հանգամանքներում և ինչ նպատակով էր դրոշը հայտնվել քաղաքացու մոտ, հայտնի չէ։ Ոստիկանությունը դեպքի վերաբերյալ լրացուցիչ տեղեկություններ չի տրամադրում, սակայն փաստ է, որ նրա նկատմամբ կազմվել է բացառապես անընթեռնելի համարանիշով տրանսպորտային միջոց վարելու վերաբերյալ արձանագրություն: Հիշեցնենք, որ այսօր համացանցում տարածվել էր մի տեսանյութ, որում Արտաշատ տանող ճանապարհով ընթանող մեքենայից ծածանվում է Ադրբեջանի դրոշը: Այս տեսանյութի տարածվելուց հետո հայտնի դարձավ, որ մեքենայի վարորդը, որն ազգությամբ հայ է և ՀՀ քաղաքացի, Ոստիկանությունում է:
