Տավուշցիների նկատմամբ ոստիկանների գործողությունները ոչ թե անընդունելի են, այլև՝ խիստ դատապարտելի, որովհետև առանց այդ էլ չափազանց խոցելի վիճակում հայտնված մարդկանց սահմանազատման-սահմանագծման գործընթացի վերաբերյալ որևէ բան հստակորեն բացատրված չէ, Azg.am-ի թղթակցի հետ զրույցում ասաց իրավապաշտպան Զարուհի Հովհաննիսյանը։
«Այս ամբողջ գործընթացն ինքնին միջազգային իրավունքի խախտում է, ներպետական օրենսդրության խախտում, որովհետև Սահմանադրությունն ինքնին առաջին հերթին սահմանների պաշտպանության խնդիր է դնում. Սահմանադրությունն այդ փաստաթուղթն է։
Տավուշում մեկնարկած գործընթացով ՀՀ իշխանությունները խախտում են բազմաթիվ միջազգային և ներպետական օրենքներ, որովհետև սահմանզատումն ու սահմանագծումը մեկօրյա խաղուպար չէ, ինչն այսօր իրականացնում է ՀՀ իշխանությունը։
Այնպես որ, այս բոլոր խախտումների ֆոնին նաև ոստիկանության բիրտ ուժը մեջտեղ բերելը ոչ միայն ժողովրդավարական արժեքների ոտնահարում է, այլև սեփական ժողովրդի հանդեպ բռնություն կիրառելու ուղիղ ձև է»,- ասաց իրավապաշտպանը։
Զարուհի Հովհաննիսյանը շեշտեց՝ խաղաղ տավուշցիների նկատմամբ ոստիկանության գործողությունները ոչ մի կերպ չի կարելի արդարացնել որպես պետականամետ, հանրության շահերից բխող գործողություններ։
«Տավուշում տեղի ունեցող իրադարձությունները խոսում են այն մասին, որ Հայաստանում, որպես այդպիսին, երկրի պետականությունը պահող իշխանություն չկա։ Այս պահին խախտվում է ամբողջ Սահմանադրությունը, և դրա պատասխանատուն, իհարկե, այսօրվա իշխանությունն է»,- ասաց մեր զրուցակիցը
Իրավապաշտպանը նաև ուշադրություն հրավիրեց այն հանգամանքի վրա, որ բացի Տավուշից՝ ոստիկանությունը վերջին շրջանում անհամաչափ ուժ է կիրառում նաև Երևանում ազատ հավաքների իրացման և քաղաքացիական տարաբնույթ ակցիաների ժամանակ։
«Ընդհանուր առմամբ՝ Հայաստանում ոստիկանական ճնշումներն արդեն իսկ հայտնվել են իրավապաշտպան կազմակերպությունների քննադատության կիզակետում և միջազգային հանրության կողմից բավականին կոշտ գնահատականի են արժանանում։
Կարծում եմ՝ կգա մի օր, որ ոստիկանությունն այլևս չի ենթարկվի այս իշխանություններին, որովհետև չեմ կարծում, որ բոլոր ուժերը կկարողանան անտարբեր մնալ կամ աչք փակել Հայաստանում տեղի ունեցող նման սարսափելի խախտումների նկատմամբ։ Ի վերջո կգա մի պահ, որ ոչ ոք այլևս այս իշխանություններին չի ենթարկվի»,- ամփոփեց Զարուհի Հովհաննիսյանը։
Հիշեցնենք, որ Կիրանց գյուղի մուտքը երեկվանից շարունակում է փակ մնալ քաղաքացիների համար։
Ոստիկանները թույլ են տալիս գյուղ մուտք գործել միայն կիրանցեցիներին։
Հիշեցնենք նաև, որ ՀՀ մարդու իրավունքների պաշտպան Անահիտ Մանասյանն այսօր ԱԺ-ում հայտարարեց՝ Տավուշում և հանրապետության տարբեր հատվածներում արձանագրվել են ոստիկանության կողմից առերևույթ անհամաչափ ուժի գործադրման դեպքեր։
