Ադրբեջանը կարող է ամեն ինչ ներկայացնել իր ցանկացած ձևով՝ վստահ լինելով, որ Հայաստանի Հանրապետությունից որևէ մեկը պետական մակարդակով չի գնալու և չի պարզելու իր գործողությունների իրավաչափությունը։ Azg.am-ի թղթակցի հետ զրույցում այս մասին ասաց իրավապաշտպան Կարապետ Պողոսյանը՝ անդրադառնալով օգոստոսի 1-ին ադրբեջանցի զինծառայողների կողմից առևանգված Արցախի քաղաքացի Ռաշիդ Բեգլարյանի կալանավորմանը:
«Ինչ վերաբերում է ադրբեջանական կողմի այն հայտարարությանը, որ տվյալ անձը «մասնակցել է Խոջալուի ցեղասպանությանը», Բաքուն այս ընթացքում էլ ավելի շատ է փորձում ստի և կեղծիքի վրա հիմնված իր հռետորաբանությունը համաշխարհային հանրությանը ներկայացնել որպես իրավաչափ և լեգիտիմ իրողություն։ Առավել ևս Արցախում իրական ցեղասպանություն իրականացնելուց հետո իր գործողություններն արդարացնելու համար Ադրբեջանը սկսեց մեր հայրենակիցներին մեղադրել շինծու գործերի մեջ։
Հասկանալի է, որ նույն ծրագրի շարունակությունն է նաև Արցախի քաղաքական վերանախավին առևանգելը, Բաքվի բանտերում ապօրինի պահելը»,- ասաց Կարապետ Պողոսյանը։
Իրավապաշտպանի խոսքով՝ Ադրբեջանն այսօր ինչ ուզում, այն էլ անում է՝ ուղիղ ՀՀ ղեկավարության լուռ հայացքի ներքո։
«Կամ էլ եթե ՀՀ իշխանություններն ինչ-որ պահի միջամտում են, ադրբեջանցիները սկսում են ցիտել նրանց ոչ հայանպաստ հայտարարությունները։ Հիշենք, թե ՄԱԿ-ի Անվտանգության խորհրդում ինչ տեղի ունեցավ, և ինչպես ադրբեջանցիներն արդարացրեցին իրենց գործողությունները՝ մեջբերելով հենց Նիկոլ Փաշինյանի խոսքերը։
Այսինքն՝ հիմա ադրբեջանցիների համար իդեալական ժամակահատված է, որպեսզի Հայաստանից ստանան այն, ինչ իրենց պետք է՝ կլինի մարդկանց առևանգել-ապօրինի դատապարտել, թե ՀՀ սուվերեն տարածքների նկատմամբ ոտնձգություններ կատարել։ Չկա մեկը, ով պետական մակարդակով կբռնի այդ երկրի ձեռքը, ավելին՝ կան ադրբեջանիցներին ուղիղ և անուղղակի ձևով աջակցող մարդիկ»,- ասաց Կարապետ Պողոսյանը։
Իրավապաշտպանն ընդգծեց՝ այսօր ՀՀ անձնագիրը որևէ քաղաքացու անվտանգություն չի երաշխավորում, ինչի վկայությունն էլ հենց Ադրբեջանի կողմից բազմաթիվ քաղաքացիների առևանգումն է։
«Նիկոլ Փաշինյանն իր կառավարությամբ բոլոր տեսակի անվտանգային համակարգերը հասցրել է այնպիսի մակարդակի, որ վաղն, օրինակ, հենց ինձ կարող են առևանգել Գյումրուց կամ ֆեյսբուքյան գրառման համար փորձեն դատապարտել։ Սա, ի դեպ, այսօր հաջող կերպով իրականացվում է։ Այսօր մեզնից որևէ մեկի՝ որևէ տեղում անվտանգությունը բացարձակապես երաշխավորված չէ։ Չզարմանաք, եթե վաղը-մյուս օրը ՀՀ որևէ քաղաքացու ձերբակալեն երրորդ երկրում, և ձերբակալման հիմք կլինի Ադրբեջանի կողմից տրամադրված, միջազգային իրավական ուժ չունեցող ինչ-որ «սև ցուցակ»։
Եվ այս ամենը վստահաբար որևէ հետևանք չի ունենալու, ավելին՝ գուցե ՀՀ իշխանությունը դեռ մի բան էլ խրախուսի նման գործընթացները՝ հայտարարելով, որ ճիշտ են արել՝ ՀՀ այդ քաղաքացիներին ձերբակալել են, նրանք իրենց էլ էին խանգարում
Քանի կա այս իշխանությունը, որևէ մեկիս անվտանգությունն ու իրավունքներն երաշխավորված չէ՝ ո՛չ ՀՀ մայրաքաղաքում, ո՛չ էլ աշխարհի որևէ երկրում»,- ամփոփեց իրավապաշտպանը։
Հիշեցնենք, որ Ադրբեջանի սահմանապահների կողմից ձերբակալված Ռաշիդ Բեգլարյանը կալանավորվել է։
Նշվում է, թե իբր Բեգլարյանը Խոջալուում տեղի ունեցած դեպքերի մասնակից է։
Ավելի վաղ հայտնի էր դարձել, որ օգոստոսի 1-ին ադրբեջանցի սահմանապահները ձերբակալել են Արցախի Հանրապետության քաղաքացի 61-ամյա Ռաշիդ Բեգլարյանին, որը մոլորվել ու հայտնվել է Ադրբեջանի կողմից վերոհսկվող տարածքում։
Օգոստոսի 2-ին Հայաստանը Ադրբեջանի նկատմամբ միջանկյալ միջոց կիրառելու պահանջով դիմում էր ներկայացրել ՄԻԵԴ։ Դիմումը վերաբերում էր մոլորվելու հետևանքով ադրբեջանական վերահսկողության տակ հայտնված Ռաշիդ Բեգլարյանի իրավունքների պաշտպանությանը։ ՄԻԵԴ–ը Ադրբեջանին մինչև օգոստոսի 10 ժամանակ էր տվել Ռաշիդ Բեգլարյանի վերաբերյալ տեղեկություններ տրամադրելու համար:
