Թէքէեան Մշակութային Միութիւնը Իր Յարգանքի Տուրքը Կը Մատուցանէ Դոկտ. Ռիչըրտ  Յովհաննիսեանին

Յուլիս 18, 2023

Թէքէեան Մշակութային Միութեան Միացեալ Նահանգներու եւ Քանատայի Կեդրոնական Վարչութիւնը կը գուժէ կորուստը Դոկտ. Ռիչըրտ Յովհաննիսեանին: Ան ամենէն ականաւոր մշակներէն եղաւ ժամանակակից մեր պատմագիտութեան մէջ:

Անոր ներդրումը եղաւ գնահատելի ոչ միայն երբ ներկայացուց Հայաստանի Առաջին Հանրապետութեան պատմութիւնը չորս հատորներու մէջ, այլեւ իր հանգամանքը օգտագործելով որպէս Քալիֆորնիոյ Համալսարանի հայագիտական ամպիոնի վարիչ՝  կազմակերպեց զանազան համագումարներ նուիրուած պատմական Հայաստանի այլեւայլ  շրջաններու, որոնք աւելի ուշ յանձնեց հրատարակութեան: Այդ նուիրական աշխատանքը օգտակար եղաւ ամերիկահայ նոր սերունդին՝ անգլերէն լեզուով ծանօթանալու իր անցեալին ու պատմութեան:

Ան իր ծառայութիւնը բերաւ Ցեղասպանութեան ճանաչման եւ դասաւանդումին ակադեմական շրջանակներէ, թէ այլապէս, մանաւանդ երբ ժամանակ մը մեր հարցը կը բախէր զանազան դժուարութիւններու եւ տուայտանքի, նոյնիսկ թրքամէտ զանազան շրջանակներու դէմ պայքարելով, երբ Թուրքիան կը նկատեն Ամերիկայի  անփոխարինելի դաշնակիցը. նոյնիսկ իր պաշտօնավարած համալսարանէն ներս բարձրաձայնելով իրականութեան ու արդարութեան ձայնը:

Դոկտ. Յովհաննիսեան արձանագրեց ցեղասպանութենէն վերապրող սերունդի մը ականատեսի վկայութիւնները նոր սերունդներու համար, որպէս պատմական անջնջելի արձանագրութիւն:

Ան ունեցած է յաճախակի այցելութիւններ Միացեալ Նահանգներու զանազան համայնքներ թէ արտասահմանեան երկիրներու բազմաթիւ գաղութներ՝ տալով դասախօսութիւններ եւ օգտակար ըլլալով այդ համայնքներուն մնալու շահագրգռուած մեր պատմական անցեալով եւ հարուստ մշակութային ժառանգութեամբ:

Դոկտ. Յովհաննիսեան իր գործով եւ անձնական օրինակով ապացուցեց, թէ ներկայ պայմաններու տակ կարելի է մնալ որքան ամերիկացի՝ նոյնքան հայ: Հոս պէտք է արձանագրել, որ իր կողակիցին՝ բժշկուհի Վարդիդեռ Քոչոլոսեան–Յովաննիսեան տասնամեակներ շարունակ նեցուկ հանդիսացաւ իր ամուսնոյն ակադեմական կեանքի աշխատանքներուն: Ողբացեալի զաւակներն ու թոռները կը շարունակեն իրենց հօր եւ մեծ հօր առաքելութիւնը, ինչպէս որդին՝ Րաֆֆի Յովաննիսեան ծանօթ քաղաքական գործիչը, որ դարձաւ Հայաստանի երրորդ հանրապետութեան առաջին արտաքին գործոց նախարարը:

Թէքէեան Մշակութային Միութեան մեծ ընտանիքը կը միանայ հայ կեանքի զանազան կազմակերպութիւններու եւ ազգայիններու ողբին: Դոկտ. Ռ. Յովհաննիսեանի յիշատակը ընդմիշտ վառ պիտի մնայ անկասկած բոլոր սերունդներու մօտ՝ յիշելով մեր անժամանցելի դատը եւ մեր արդար իրաւունքները:

Թէքէեան Մշակութային Միութեան

Մ. Նահանգներու եւ Քանատայի

Կեդրոնական վարչութիւն