Լիբանանի Ֆինանսներու Նախարարութեան Նոր Գիւտը. Տոլարով Աշխատավարձ Ստացողները Այսուհետեւ Պիտի Յատուկ Հարկ Վճարեն

14

Լիբանանի Ֆինանսներու նախարարութիւնը սեփական մարզի գործատէրերուն շուտով պիտի պարտաւորեցնէ գրանցել ամերիկեան տոլարով վճարուող իրենց աշխատողները, որոնց տոլարային ամսավճարները պիտի հարկուին յետադարձ կարգով 1 Յունուար 2022էն սկսեալ:

Նախարարութեան սոյն որոշումը զայրոյթի ալիք բարձրացուց սեփական մարզի գործատէրերուն եւ աշխատաւորներուն մօտ, որոնք խստօրէն դատապարտեցին այս որոշումը:

Արդարեւ նիւթական լուրջ դժուարութիւններ դիմագրաւող կառավարութիւնը այս նմանօրինակ հարկերով է, որ կը փորձէ իր պիւտճէի բացը գոցել, պետական մարզի աշխատողներուն ամսավճարները տալու համար: Այնպէս մը, որ կառավարութիւնը սկսած է եկամուտի աղբիւրներ մոմով փնտռել:

Մաքսային տոլարի սակագինի բարձրացումէն ետք, որ ժխտական պիտի ազդէ սպառողական ապրանքներու գիներուն վրայ, ահաւասիկ այս նոր միջոցառումը, աւելի եւս պիտի սրէ բարդ իրավիճակը ընկերութիւնները հասցնելով սնանկացումի աստիճանին:

Ընդհանուր մտավախութիւնը այն է, որ այս նոր հարկին ճնշումին տակ, շատ մը աշխատատեղիներ ստիպուած պիտի փակուին, մինչ աշխատողները զրկուելով իրենց աշխատավարձին կարեւոր մէկ մասէն գաղթի ճամբայ պիտի որոնեն:

«Զարթօնք»