Նիկոլ Փաշինյանն իր մերձավորին փրկելու համար ինչ-որ ժամանակով հարվածեց 2-րդ բանակային կորպուսի մարտունակությանը. ռազմական փորձագետ

33

Ենթադրում եմ, որ այս օրերի ընթացքում պաշտպանության նախարար Սուրեն Պապիկյանը զբաղված էր իր պաշտոնը պաշտպանելու խնդիրներով, մեղավորներ նշանակելով և անձնական PR-ով։ Նրա այցն, իհարկե, ուշացած է, Azg.am-ի թղթակցի հետ զրույցում ասաց ռազմական փորձագետ Կարեն Վրթանեսյանը՝ անդրադառնալով Պապիկյանի՝ միայն այսօր 2-րդ բանակային զորամիավորում և ինժեներասակրավորային վաշտի կացարանում բռնկված հրդեհի վայր այցելելուն։

Անդրադառնալով Գարեգին Պողոսյանին 2-րդ բանակային կորպուսի հրամանատար նշանակելու հանգամանքին՝ ռազմական փորձագետը նկատեց՝ արագ նշանակումը հասկանալի է, իսկ ահա նախկին հրամանատարին և հրամանատարական կազմին աշխատանքից շուտափույթ ազատելն՝ անհասկանալի։

 «Ըստ էության՝ կորպուսը գլխատվեց, կորպուս, որն այսօր առաջնագիծ է պահում։ Ակնհայտ է, որ մարտական կորպուսը շարքից հանեցին՝ ինչ-որ ժամանակով։ Ընդ որում, այնպես չէ, որ նոր հրամանատարին նշանակեն, միանգամից կկարողանա արագ կառավարել։ Դրա համար լրացուցիչ ժամանակ է պահանջվում։

Այսինքն, ըստ էության, Սուրեն Պապիկյանին փրկելու, նրանից ուշադրությունը շեղելու և գործողության տպավորություն ստեղծելու համար արագ հայտարարեցին պաշտոնանկությունների մասին»,- ասաց Կարեն Վրթանեսյանը։

Ըստ նրա՝ նույն շարքից է նաև պաշտպանության նախկին նախարար Սեյրան Օհանյնաի դեմ քրեական գործերի թեման։

«Ամբողջ նպատակը Սուրեն Պապիկյանի քաղաքական կարիերան փրկելն է։ Ըստ էության՝ Նիկոլ Փաշինյանն իր մերձավորին փրկելու համար ինչ-որ ժամանակով հարվածեց բանակային կորպուսի մարտունակությանը՝ առանց որևէ քննության, առանց լուրջ եզրակացությունների»,- ասաց Կարեն Վրթանեսյանը։