Այսօր հրավիրված մամուլի ասուլիսի ժամանակ ՀՀ վարչապետ Նիկոլ Փաշինյանն, իր իսկ խոսքով, զերծ մնԱՑ հոգևորականների հասցեին վիրավորական բառապաշար օգտագործելուց, բայց միաժամանակ հույս հայտնեց որ բարձրաստիճան հոգևորականները ճեմարան ընդունվելիս «փաստեր ներկայացրել են՝ ընդհուպ մինչև իրենց սեռական առողջության վերաբերյալ»։
Հիշեցնենք, որ եկեղեցու հասցեին ՀՀ վարչապետ Նիկոլ Փաշինյանի աղմկահարույց ձևակերպմանն արձագանքելով՝ Մայր Աթոռի դիվանապետ Արշակ արքեպիսկոպոս Խաչատրյանն ասել էր. «Եթե ոմանք ուզում են եկեղեցագիտությամբ զբաղվել, կարող են փորձել ընդունվել Հոգևոր ճեմարան, եթե, իհարկե, հաղթահարեն ընդունելության համար սահմանված կրթական շեմն ու համոզիչ փաստարկներ ներկայացնեն առողջական բարվոք վիճակի վերաբերյալ»։
«Հայտարարության հեղինակներին չեմ հակադարձի վիրավորանքներով, որովհետև քաղաքական մրցակիցներին վիրավորելը ճիշտ ժանր չէ։ Տեսնում եք, որ ես փորձում եմ այդ ժանրից հրաժարվել։ Ինչ վերաբերում է հոգևոր ճեմարան ընդունվելուն, ես հույս ունեմ, որ հոգևոր ճեմարանն ավարտած և բարձրաստիճան պաշտոններ զբաղեցրած բոլոր անձինք հոգևոր ճեմարան ընդունվելիս և ավարտելիս բավարար փաստարկներ և փաստեր ներկայացրել են իրենց հոգևոր, մարմնական, ընդհուպ մինչև սեռական առողջության վերաբերյալ։ Համոզված եմ դրանում, որ ներկայացրել են, այնպես որ, մտահոգվելու մեծ բան չկա»,- ասաց ՀՀ վարչապետը։
