Մայրաքաղաքի 19 սպասարկման կետերում և Հանրապետության շրջկենտրոններում սննդամթերքի որոշ տեսակների վաճառքի ու ձեռքբերման համար նախատեսված կտրոնների բնակիչներին տրամադրման գործընթացն սկսվել է այսօր` հունվարի 18-ին` ժամը 09:00-ից ու շարունակվելու է մինչև 20:00-ն:
«Արցախպրեսի» թղթակցի հետ զրույցում Արցախի Հանրապետության Բնակարանային հարցերի կոմիտեի նախագահի ժամանակավոր պաշտոնակատար Իննա Իշխանյանն ասել է, որ աշխատանքներն ընթանում են առանց դժվարությունների։
«Պայմանավորված Արցախի Հանրապետությունում էկեկտրաէներգիայի հովհարային անջատումներով՝ սպասարկման կետերի համար մշակվել է հատուկ աշխատանքային գրաֆիկ՝ համաձայն «Արցախէներգո» ՓԲԸ-ի կողմից տրված տեղեկատվության: Քաղաքացիները սպասարկման աշխատաժամերի գրաֆիկներին կարող են ծանոթանալ ԱՀ տեղեկատվական շտաբի, ԱՀ սոցիալական զարգացման և միգրացիայի նախարարության և ԱՀ բնակարանային հարցերի կոմիտեի կողմից տրվող հայտարարությունների միջոցով:
Անհարկի խնդիրներից խուսափելու համար հարկ է ևս մեկ անգամ շեշտել, որպեսզի քաղաքացիները սպասարկման վայրեր մոտենան բոլոր անհրաժեշտ փաստաթղթերի բնօրինակներով՝
չափահաս անձը՝ անձը հաստատող փաստաթղթով և հանրային ծառայությունների համարանիշով (ՀԾՀ) կամ նույնականացման քարտով, ինչպես նաև ընտանիքի
անչափահաս անդամների ծննդյան վկայականով և հանրային ծառայությունների համարանիշով (ՀԾՀ)»,-մանրամասնել է Ի. Իշխանյանը։
Նրա իրազեկմամբ՝ Արցախում բնակվող օտարերկրյա քաղաքացիները և անձը հաստատող փաստաթղթի հետ խնդիրներ ունեցող անձինք պետք է դիմեն Ստեփանակերտի №1 սպասարկման կենտրոն(Բնակարանային հարցերի կոմիտեի շենք):
Օրվա ընթացքում կտրոնների տրամադրման կետերում հերթեր են նկատվել։ Յուրաքանչյուր ընտանիքից մեկ անդամ մյուսների անձը հաստատող փաստաթղթերով ներկայանում է սպասարկման կետ ու ստանում կտրոնները։
«Ընդհանուր առմամբ, գոհ եմ, որ այս տարբերակն է մշակվել սննդամթերքի ձեռքբերման համար։ Կտրոնների միջոցով ապրանքատեսակները կբաշխվեն բոլորին հավասարաչափ»,-մեզ հետ զրույցում ասել է մայրաքաղաքի բնակչուհի Սիլվա Սահակյանը։
