Արցախի Հանրապետության նախագահին հասցեագրված բաց նամակով մտավորականները ցանկացել են շեշտել պարտության դառնությունը և դրա հետևանքները, պարտության, որը հայ ժողովրդին արժեցավ ոչ միայն Արցախի մեծ մասի կորուստ, այլև Արցախի գոյության-չգոյության խնդիր, Azg.am-ի թղթակցի հետ զրույցում ասաց բանասիրական գիտությունների թեկնածու, դոցենտ Սերժ Սրապիոնյանը, ով, ի թիվս այլ մտավորականների, ստորագրել է վերոնշյալ բաց նամակի ներքո։
«Անընդհատ լուրեր են տարածվում, որ Արայիկ Հարությունյանը ինչ-որ գաղտնի-մշուշոտ գործունեություն է ծավալում ադրբեջանցիների հետ, ինչ-ինչ պայմանավորվածություններ ձեռք բերում։ Այս լուրերն, ըստ էության, մեղադրանք են, որոնք ոչ մի անգամ պաշտոնապես չեն հերքվել»,- նշեց մեր զրուցակիցը։
Սերժ Սրապիոնյանը շեշտեց՝ ինքն ու իր մտավորական ընկերները երբեք քաղաքական գնահատական չեն տվել ԱՀ պետնախարար Ռուբեն Վարդանյանի գործունեությանը, սակայն տեսնում են, որ իր հարցազրույցներում և ելույթներում նա առաջ է քաշում Արցախին վերաբերող ամենակենսական հարցերը։
«Մեր համոզմամբ՝ դա ճիշտ դիրքորոշում է, այսինքն՝ Արցախը շնչող օրգանիզմ է, մահացած չէ, և ամեն մեկը, ներողություն եմ խնդրում բոլոր արցախցիներից, չպետք է Արցախը դնի զոհված կենդանու կամ լեշի տեղ և կտցի նրանից։ Սա է մեր խնդիր է։ Մենք նախազգուշացնում ենք չխանգարել Արցախի կենսունակ ուժերին լուծելու երկրի առջև ծառացած խնդիրները, որովհետև հստակորեն հայտարարվել է, որ Հայաստանը ձեռքերը լվացել է Արցախից։
Այլ կերպ ասած՝ Արցախը դրված է գայլի բերան, և գայլի բերանից Արցախը պաշտպանող միակ որսորդն այսօր Ռուբեն Վարդանյանն է՝ իր վարքագծով»,- ասաց Սրապիոնյանը՝ շեշտելով, որ մտավորականների համար ամենևին կարևոր չէ՝ նա ռուսամոլ է, ռուսաֆոբ, թե մեկ այլ բան։ Ամենակարևորն, ըստ մեր զրուցակցի, այն է, որ Վարդանյանը ծառայում է Արցախի փրկությանը։
«Շուտով մեր կողմից գործողություններ էլ կլինեն, բայց չեմ ուզում առաջ ընկնել և մանրամասներ հայտնել։ Հանրությունը դրանց կծանոթանա. կլինեն քայլեր, որոնք չեն վնասի Արցախին, ավելին՝ կնպաստեն Արցախի ապաշրջափակմանը։ Ենթադրում ենք, որ կոնկրետ քայլերրի կդիմենք մինչև փետրվարի 20-ը։
Մինչ այդ Արցախի Հանրապետության նախագահին ասում ենք, որ նա իրավունք չունի հրաժարական ներկայացնել, որովհետև դա դե յուրե նշանակում է Արցախի անիշխանություն։ Արայիկ Հարությունյանը պետք է մնա այնքան, մինչև Արցախի խնդիրը կլուծվի։
Նա իրեն և Արցախին դրել է մի վիճակի մեջ, որ իր հրաժարականն անհրաժեշտություն է, բայց՝ ոչ այս պահին։ Մյուս կողմից ակնհայտ է, որ Արայիկ Հարությունյանն Արցախի հարցն օրեցօր լրացուցիչ փակուղի է տանում»,- ասաց Սերժ Սրապիոնյանը։
Հիշեցնենք, որ ավելի վաղ մի խումբ մտավորականներ բաց նամակ էին հղել ԱՀ նախագահ Արայիկ Հարությունյանին՝ գրելով, որ հենց նա է գլխավոր պատասխանատուն, որ տարածքային և մարդկային աննախադեպ մեծ կորուստներից բացի՝ մսխվել է նաև այն տասնյակ հազարավոր հայորդիների արյան ու կյանքի գնով ձեռք բերված հաղթանակը։
