Ադրբեջանի կողմից նոր պատերազմի հավանականությունը մեծ է՝ սկսած 2020 թվականի նոյեմբերից, երբ սկսեցինք զիջել ՀՀ անվտանգությունն ապահովող ռազմավարական տարածքները։ Այդ պահից սկսած՝ Նիկոլ Փաշինյանը հրաժարվեց մեր անվտանգության իրական երաշխիքներից, Azg.am-ի թղթակցի հետ զրույցում ասաց ռազմական փորձագետ Կարեն Վրթանեսյանը՝ անդրադառնալով վերջին օրերին Հայաստանում և Արցախում շփման գծի ամբողջ երկայնքով նկատվող ադրբեջանական զինուժի և ծանր տեխնիկայի տեղաշարժին։
«Այդ հրաժարման հետևանքով մեզ անընդհատ և ցանկացած պահի մեծ պատերազմի վտանգ է սպառնում։ Ադրբեջանը դա չի էլ թաքցնում, բացահայտ սպառնալիքներ է հնչեցնում, մեզնից պահանջում այս տարածքը՝ Հայաստանն, ընդհանրապես լքել։ Որքան կարողանան՝ առաջ են գալու՝ խաբելով, համոզելով, վախեցնելով և նաև դիմելով զինված գործողությունների»,- ասաց մեր զրուցակիցը։
Կարեն Վրթանեսյանի խոսքով՝ Ադրբեջանը պատրաստ է ցանկացած պահի՝ 24-48 ժամվա ընթացքում, պատերազմական նոր գործողություններ ձեռնարկել Հայաստանի դեմ։
«Որովհետև ադրբեջանցիները զբաղեցրել են տակտիկական և ռազմավարական գերիշխող դիրքեր և բարձունքներ, իրենց զորքը վերազինել և վերադասավորել են և ինչ ուզեն՝ կարող են անել։
Նիկոլ Փաշինյանն ասում էր՝ հո մի դատարկ սարի համար չե՞նք կռվելու։ Հիմա թշնամին, Սև լճի «չոլերում» ամրացած, սպառնում է Գորիսին, Իշխանասարում ամրացած՝ սպառնում է Սյունիքի հետ մեր ճանապարհին, Գորիս-Կապան ճանապարհը կտրել է, և Իրանի հետ մեր ստաբիլ կապը հիմա օդում կախված է»,- նշեց ռազմական փորձագետը։
Կարեն Վրթանեսյանն ուշադրություն հրավիրեց այն հանգամանքի վրա, որ ՀՀ իշխանությունները բանակի ամրապնդման ուղղությամբ որևէ քայլ չեն անում, հակառակը՝ անում են ամեն ինչ՝ թուլացնելու Զինված ուժերը։
«Բոլոր այն հայտարարությունները, որ բանակի ներսում դավաճաններ կան, խոսում են այդ մասին։ Բոլորին է հայտնի՝ իրենք իրենց արած-չարածների մեջ միշտ ուրիշներին են մեղադրում. բանակը քանդեցին, հիմա էլ ասում են՝ մեզ պաշտպանող չկա։ Եվ բոլորովին այնպես չէ, որ չէին հասկանում՝ ինչ են անում։
Այս իրավիճակում ՀՀ շարքային քաղաքացին գոնե հոգեպես պետք է պատրաստ լինի պատերազմական նոր գործողությունների և հասկանա՝ քանի դեռ մենք բանակը չենք վերականգնում՝ պատերազմի վտանգը միշտ առկա է լինելու»,- ասաց ռազմական փորձագետը։
Մեր զրուցակիցը միաժամանակ նկատեց՝ Ադրբեջանի համար այլևս զսպիչ ուժ չեն նաև Արցախում տեղակայված ռուս խաղաղապահները։
«Ազդեցությունը թուլացել է, և Ադրբեջանը շատ է ոգևորվել՝ մի կողմից ռուս-ուկրաինական պատերազմից, մյուս կողմից՝ Փաշինյանիի վարած քաղաքականությունից, որն, ըստ էության, Ռուսաստանի հետ բաց բախման գնալու քաղաքականություն է»,- ամփոփեց Վրթանեսյանը։
