Ստամբուլից տեղեկանում ենք, որ տեղի «Արաս» հրատարակչությունը լույս է ընծայել Արա Ակինյանի «Մեծ պատրիարքը» վեպը: Այն ներկայացնում է հայ ժողովրդի պատմության կարեւորագույն մի հատվածՙ XIX դարի կեսերից XX դարի սկիզբն ընդգրկող շրջանը: Հեղինակը ներկայացնում է Մաղաքիա արքեպիսկոպոս Օրմանյանի արտակարգ հետաքրքրական կյանքից դրվագներ: Հայ եկեղեցու հոգեւոր հայրերից ամենանշանավորըՙ Մաղաքիա Օրմանյանը, հիրավի իր գործունեությամբ եւ գրչով վաստակել է սերունդների հարգանքն ու հիացմունքը:
Ավազանի անունով Պողոս, նա ուսումնառել է նախ Հռոմում, դարձել Անտոնյանց միաբանության անդամ, վերադառնալով Պոլիս, զբաղվել է Հայ կաթողիկե համայնքի խնդիրներովՙ պայքարելով Վատիկանի քաղաքականության դեմ, որի հետեւանքով Վարժապետյան պատրիարքի օրոք դարձ է կատարել դեպի Հայ առաքելական եկեղեցի: Ապա քարոզիչն է եղել Ղալաթիո Սուրբ Գրիգոր Լուսավորիչ եկեղեցու, Շիշլիի գերեզմանատան կարգադիր հանձնաժողովի նախագահը, Կարինի (Էրզրում) առաջնորդը, ուսուցչություն է արել Էջմիածնի Գեւորգյան ճեմարանում, եւ վերջապես Թուրքիայի հայոց պատրիարքն էր: 1908 թ. օսմանյան սահմանադրության հռչակումից հետո սաստկացել են նրա դեմ հալածանքները, կյանքի տագնապալի օրերը, դրանով հանդերձ սակայն ստեղծագործական բուռն վերելք է ապրել:
Գիրքը բաղկացած է 44 գլուխներից, ընդգրկված երկու 2 մասերում: Արա Ակինյանի այս վեպը 1950-51 թթ.-ին լույս է տեսել «Ժամանակ» օրաթերթում, թերթոնային եղանակով: Գիրքը հրատարակության է պատրաստել Արտաշես Մարկոսյանը, ձեւավորումըՙ Արետ Կըճըրի:
