Աղբյուր՝ interfootball.am
Չեմպիոնների լիգայի կիսաեզրափակչի պատասխան հանդիպման շրջանակում «Չելսին» սեփական հարկի տակ մրցեց «Ռեալի» դեմ։
Հիշեցնենք, Մադրիդում կայացած առաջին խաղում կողմերը հանդիպումն ավարտեցին 1:1 հաշվով։
Պատասխան համդիպումը որոշ վերապահումներով մեկնարկեց հավասար պայքարում, սակայն «Չելսիի» ֆուտբոլիստների գրոհներն ավելի վտամգավոր էին։
11-րդ րոպեին հեռահար հարվածով փորձեց աչքի ընկնել Անտոնիո Ռյուդիգերը, սակայն նրա «կրակոցից» հետո Տիբո Կուրտուան փրկեց մադրիդյան ակումբին։
19-րդ րոպեին Բեն Չիլվելը հարձակման ձախ եզրից հարվածային դիրք դուրս բերեց Տիմո Վերներին, ով մոտ տարածությունից գրավեց մրցակցի դարպասը, սակայն հանդիպան գլխավոր մրցավար Դանիելե Օրսատոն չհաշվեց գոլը` արձանագրելով խաղից դուրս վիճակ։
«Արքայական» ակումբն իր առաջին իրական գոլային պահը ստեղծեց 26-րդ րոպեին, երբ մրցակցի տուգանային հրապարակի մատույցներից պտտեցրած հարվածով մրցակցի դարպասին սպառնաց Կարիմ Բենզեման, սակայն «ազնվականներին» փրկեց դարպասապահ Էդուարդ Մենդին։
Հաջորդ իսկ գրոհներից մեկի ընթացքում Թոմաս Տուխելի սաները բացեցին խաղի հաշիվը. 29-րդ րոպեին Նգոլո Կանտեն դաշտի կենտրոնով անցում կատարեց՜ հարվածային դիրք դուրս բերեց Կայ Հավերցին, ում հարվածից հետո «Ռեալօն» փրկեց դարպասաձողը, սակայն վրա հասած Տիմո Վերները, ի վերջո, խփեց իր գոլը` հաշիվը դարձնելով 1:0։
35-րդ րոպեին «սերուցքայինները» մոտ էին հաշիվը հավասարեցնելուն, սակայն Բենզեմայի` մոտ տարածությունից կատարած հարվածից հետո կրկին փայլեց Մենդին։
Առաջին կեսի վերջնամասում էլ լոնդոնյան ակումբի ֆուտբոլիստներն ունեին սռավելություն, սակայն, ամեն դեպքում, կողմերն ընդմիջման գնացին 1:0 հաշվի պայմաններում։
Երկրորդ կեսի հենց մեկնարկում` 47-րդ րոպեին, «Չելսիի» ֆուտբոլիստները շատ մոտ էին հաշիվը կրկնապատկելուն, սակայն Կայ Հավերցի հարվածից հետո գնդակը դիպավ դարպասաձողին։
Ինչ-որ պահից սկսած հանդիպումը բացվեց. Զինեդին Զիդանի թիմը փորձում էր բեկել դիմակայության ընթացքը, իսկ «կապույտները» վտանգավոր հակագրոհում էին։
59-րդ րոպեին աչքի ընկնելու հերթական պահն ուներ Հավերցը, սակայն նրա հարվածից հետո այս անգամ փրկեց Տիբո Կուրտուան։
Մադրիդցիների պաշտպանությունը սկսում էր ճեղքեր տալ. 66-րդ րոպեին Տիմո Վերները Նգոլո Կանտեին մեն-մենակ դուրս բերեց Կուրտուայի դիմաց, սակայն ֆրանսիացի կիսապաշտպանը չկարողացավ հաղթող դուրս գալ այդ մենապայքարում։
Ճիշտ է` Զիդանի թիմը գնդակին շարունակում էր տիրել ավելի շատ, սակայն «Ռեալի» ֆուտբոլիստների խաղում բացարձակ սրություն չկար, իսկ «ազնվականները» մեկը մյուսի հետևից վատնում էին գոլային պահերը։
Ակնհայտ էր, որ «Չելսիի» գոլը հասունանում էր. 85-րդ րոպեին Քրիստիան Պուլիշիչի փոխանցումից հետո աչքի ընկավ Մեյսոն Մաունթը։
Այսպիսով, «Չելսին» հաղթեց «Ռեալին» 2:0 հաշվով և նվաճեց Չեմպիոնների լիգայի եզրափակաչի ուղեգիր, որի շրջանակում մայիսի 29-ին Ստամբուլում կմրցի «Մանչեսթեր Սիթիի» դեմ։
