Ադրբեջանի կողմից հայկական կողմին փոխանցված 10 հայ զինծառայողների մարմիններից 5-ի պարագայում ունենք արդեն փորձաքննության արդյուքները, մյուսներինը դեռևս ընթացքի մեջ է։ Այս մասին լրագրողների հետ զրույցում ասաց ՀՀ առողջապահության նախարար Անահիտ Ավանեսյանը՝ հավելելով, որ ամբողջությամբ ավարտելուց հետո լրացուցիչ կտեղեկացնեն։
Անդրադառնալով այն հանգամանքին, որ Արցախյան երրորդ՝ 44-օրյա պատերազմից հետո ևս կային մարմիններ, որոնց հետ կապված փորձաքննություններ էին իրականացվել, Ավանեսյանն ասաց, որ այդ պրոցեսն ամբողջովին ավարտված է: Նրա փոխանցմամբ՝ արտերկիր ուղարկված փորձաքննությունների, նույնականացումների ամբողջ պրոցեսը փաստաթղթավորված է:
«Իհարկե, ունենք դեպքեր, երբ նույնականացված մարմինները ծնողների կողմից չեն ընդունվել, չեն հուղարկավորվել: Սա շատ նուբ թեմա է եւ որքան ժամանակն անցնում է, այնքան դժվարանում է այդ գործընթացը»,- ասաց Ավանեսյանը:
