Ամեն օր միջազգային հանրության լուռ աջակցությամբ Հայաստանում ոտնահարվում են մարդու իրավունքները, հաստատվում է բռնապետություն. «Դիմադրություն» շարժման ներկայացուցիչներն ու նրանց աջակիցները ՄԱԿ-ի հայաստանյան ներկայացուցչության մոտ բողոքիա ակցիա են իրականացրել՝ «Ազատություն քաղբանտարկյալներին» պահանջ-պաստառներով:
Նրանց շատ ավելի վաղ այստեղ մեծաթիվ ոստիկաններ էին հասել, շրջապատել գրասենյակի մուտքը, պարիսպները: Իսկ ընդդիմությունն ու շարքային քաղաքացիները, որոնք դեմ են քաղբանտարկյալներ պահող, նրանց կալանավայրերում ու դատարանի դահլիճներում սպանող իշխանությանը, հավաքվել էին, որ հարցնեն՝ միջազգային հանրությունը չի՞ տեսնում այս ամենը:
«Ավելի քան 70 տարի գոյություն ունի Մարդու իրավունքների համընդհանուր հռչակագիրը, որտեղ 3-րդ հոդվածը նվիրված է կյանքի իրավունքին: Ամենակարեւոր իրավունքն է. եթե չկա կյանք, չկան մնացած իրավունքները,-նշել է ռեժիսոր Հովհաննես Իշխանյանը,- մենք արդեն ունենք 3 քաղբանտարկյալ, որոնք զրկվել են կյանքի իրավունքից այս իշխանության օրոք»:
«Հայաստանում արդեն երկու տասնյակից ավելի մարդ է գտնվում անազատության մեջ ՝ քաղաքական հայացքների, իսկ ավելի շուտ, իշխանություններին քննադատելու եւ Արցախի հանձման ու Հայաստանի թրքացման գործընթացները կանխելու փորձի համար: Նրանցից շատերն առողջական խնդիրներ ունեն, բայց դա իշխանություններին չի հուզում, նրանք կարծես հագենում են հայրենակիցների արյամբ»,- նկատել են ակցիայի մասնակիցները:
«Դատական նիստի ժամանակ, ուղիղ եթերում մարդ է մահանում, դուք լռում եք: Այս ամենը չի՞ հակասում ձեր սկսզբունքներին,- հարցրել է ակցիայի մասնակից Աննա Հովները,- սա՞ է ձեր ժողովրդավարությունը»:
Մեկ այլ մասնակցի ՝ Հովհաննես Հարությունյանի պնդմամբ էլ իրավական համակարգն ու դատարանները իշխանության ձեռքին դարձել են ընդդիմադիրներից վրեժխնդիր լինելու գործիք:
«Այսօր ՀՀ-ում դատավորները վերածվել են կիլլերների իշխանությունների ձեռքում, վարձու մարդասպանների, եւ եթե իրենց թվում է, որ մոռացվելու է այն հրահանգներից, որոնք իրենք կատարել են եւ որոնց հետեւանքով մարդկանց կյանք է խլվել, չարաչար սխալվում են: Ոչինչ չի մոռացվելու, գալու է ձեր դատաստանի օրը»:
Հետո «Բանտը՝ դավաճանին, ազատությունը՝ տղերքին» վանկարկումներով ու քաղբանտարկյալների նկարներով քաղաքացիները երթով կառավարութուն շարժվեցին: Այստեղ էլ մուտքը հսկում էին ոստիկանները՝ մի քանի շարքով:
Խորհրդարանի «Հայաստան» խմբակցության պատգամավոր Գեղամ Մանուկյանը նկատեց՝ քաղաքացիների մեծ մասը եկել է «Նիկոլ՝ մարդասպան» պաստառներով:
«Անցնող 4 տարիների ընթացքում այդ մարդու կառավարումը բերել է արյուն, արցունք, հազարավոր մահեր՝ համաճարակի, պատերազմի ու անազատության պատճառով»:
Մի քանի ելույթից հետո ակցիան ավարտվեց, տարածքում մնացին փոքրաթիվ ոստիկաններ ու ակցիայի խորհրդանիշ պաստառները:
