«Միջազգային իրավունքում կամ միջազգային հարաբերություններում դատարանների որոշումները և դրանց ի կատար ածումը շատ են տարբերվում ներպետական դատարանների որոշումների կատարման գործընթացից։
Միջազգային իրավունքում և միջազգային հարաբերություններում, ցավոք, չունենք նման ինստիտուտ, որը զբաղվի միջազգային դատարանի որոշումների հարկադրաբար կատարման ուղղությամբ։
Ամբողջ պրոցեսը, բնականաբար, քաղաքական է, և այդ քաղաքական պրոցեսը ենթադրում է նաև աշխատանք, որովհետև այն մարմինը, որը որոշակի պատասխանատվություն է կրում Արդարադատության միջազգային դատարանի վճիռների և որոշումների կատարման համար, ԱԽ-ն է, որը երբ խնդիր առաջանա, պետք է իրավասու լինի միջամտելու։
Բոլորս էլ հասկանում ենք, որ ԱԽ միջամտությունն այսօր բարդ է, կան մշտական անդամներ, քաղաքականացվածությունը բարձր է, բայց դրանից զատ, մինչև դրան հասնելը՝ կան միջոցներ իրավական գործընթացից մաքսիմալ պտուղներ քաղելու համար»,-Հաագայի դատարանի՝ Բերձորի միջանցքը բացելու որոշման մասին հայտնել է Միջազգային իրավական հարցերով ՀՀ ներկայացուցիչ Եղիշե Կիրակոսյանը։
Այս անգամ որևէ ժամկետ չի նշվել դատարանի կողմից։
Որոշման մեջ նշվում է, որ այն ունի պարտադիր բնույթ, ընդունման պահից այն պարտադիր է կողմերի համար, այն պետության համար, կոնկրետ այս պահին՝ Ադրբեջանի, որի նկատմամբ կիրառվել է նման միջոցը։
Սա նշանակում է, որ Ադրբեջանը պետք է անմիջապես քայլեր ձեռնարկի՝ կատարելու Հաագայի դատարանի որոշումը, բայց, ինչպես տեսնում ենք, մեր թշնամին անդրդվելի է ու անպատժելի։
