Հայաստանի Հանրապետության նկատմամբ հնարավոր է լինի հիբրիդային հարձակում, մեր ժողովրդավարությունը վտանգի տակ դնել, տարբեր տեսակի կեղծ լուրերով, ընտրակաշառքով ազդել ընտրություևնների վրա. ԱԺ-ում, լրագրողների հետ ճեպազրույցի ժամանակ ասաց Էկոնոմիկայի նախարար Գևորգ Պապոյանը։
Նա կարծում է, որ կան երկրներ, որոնք չեն ցանկանա, որ Հայաստանում լինեն ժողովրդավարական ընտրություններ, և Հայաստանն ունենա ժողովրդի կողմից ընտրված ղեկավար։
Լրագրողները փորձեցին ճշտել՝ խոսքը Ռուսաստանի՞ մասին է։
«Ես որևէ երկրի անուն չտվեցի։ Ցանկացած անձ կամ երկիր, եթե փորձի ազդել ՀՀ ընտրությունների վրա փողի, կեղծիքների, ընտրակաշառքի ձևով, ժողովրդավարության պարտավորությունն է պաշտպանել իրեն։ ժողովրդավարությունը պետք է ունենա փող, ուժ գիտելիքներ, որ պաշտպանի իրեն»,-ասաց նախարարը։
Նրա կարծիքով՝ առավել քան հիմքեր եղել են Սրբազաններին կալանավորելու համար։
«Երբ տեսնում եմ հայտարարությունները և դրանք համեմատում եմ մեր Քրեական օրենսգրքի հետ, հասկանում եմ, որ ապօրինություն կլիներ, եթե հակառակը լիներ՝ նրանք չկալանավորվեին»,- նկատեց Պապոյանը։
Հարցին, թե ժողովրդավարությո՞ւն է, երբ քաղաքացու բերանը փակելով՝ դուրս են հանում եկեղեցուց, Պապոյանը պատասխանեց. «Երբ մի տեղ հավաքված է հազար հոգի, մեկը չի կարող գալ և իր կամքը պարտադրել հազար հոգուն։ Ժողովրդավարությունն ասում ա՝ պետք ա էդ ժամանակ էդ մարդուն ուղեկցես դուրս, ինչպես արվում ա, որպեսզի մնացած հազար հոգու շահերը պաշտպանվեն»։
