Հայաստանի Թեքեյան մշակութային միությունը հայտնում է «Վահան Թեքեյան» ամենամյա մրցանակաբաշխության մեկնարկի մասին։
Ավանդաբար ընդունվում են նախորդ տարվա, այսինքն՝ 2022 թվականի ստեղծագործությունների հայտերը 4 անվանակարգում՝ գրականություն, հայագիտություն, կերպարվեստ, կիրառական արվեստ։
«Վահան Թեքեյան» մրցանակաբաշխությունը միջազգային է և անց է կացվում 29-րդ անգամ։ Մասնակիցները նախորդ տարիներին եղել են ոչ միայն Հայաստանից, այլև աշխարհի տարբեր երկրներից, որոնք նաև մրցանակների են արժանացել։
Հաղթողներին դրամական պարգև է տրվում ՝ շնորհիվ Շաքե Թեքեյան-Ղազարյան հիմնադրամի ֆինանսական աջակցության։
4 անվանակարգերում «Վահան Թեքեյան» մրցանակակիրները կստանան 1500-ական դոլարին համարժեք դրամական պարգև։
Մրցույթին մասնակցել ցանկացողները
• www.armtmm.com կայքում պետք է սեպտեմբերի 1-ից մինչև հոկտեմբերի 1-
ը ներառյալ լրացնեն մասնակցության հայտը՝ նեկայացնելով 2022
թվականին իրենց հեղինակած աշխատանքների վերաբերյալ ճշգրիտ
տեղեկատվություն,
• մինչ հայտը լրացնելը, անհրաժեշտ է ծանոթանալ մրցույթի պայմաններին,
• հայտերի լրացումը հասանելի կլինի սեպտեմբերի 1-ից,
• սխալ կամ թերի լրացված հայտերը չեն դիտարկվի,
• հայտը կհաստատվի կամ կմերժվի` Ձեր էլեկտրոնային հասցեին հետադարձ
նամակով։
Մրցույթին մասնակցելու հայտեր կարող են ներկայացնել ինչպես Հայաստանից, այնպես էլ աշխարհի տարբեր երկրներից։
«Վահան Թեքեյան» մրցանակաբաշխության անվանակարգերը նախկինում հասել են 13-ի՝ ընդգրկելով գիտության ու մշակույթի բազմաթիվ ոլորտներ։ Այս տարի գնահատելով 2022 թվականի աշխատանքները գրականության, հայագիտության, կերպարվեստի ու կիրառական արվեստի ոլորտների՝ ընդհանուր առմամբ 4 անվանակարգերում՝ մրցանակաբաշխության նախաձեռնողները հույս ունեն, որ էլի կգան լավ ու բարի ժամանակներ, անվանակարգերը էլի կանցնեն մեկ տասնյակը։ Ազգապահպան, մշակութային նախաձեռնությունները պետք է շարունակվեն ամեն գնով։
«Վահան Թեքեյան մրցանակաբաշխությանը ներկայացված աշխատանքները գնահատելու է պրոֆեսիոնալներից կազմված հանձնաժաղովը։ Նշենք, որ անցած 28 տարիներին «Վահան Թեքեյան» մրցանակ է շնորհվել գիտության ու մշակույթի 200-ից ավելի գործիչների։
Մանրամասները՝ տեսանյութում.
