Տավուշի այս հատվածը մեր Հայրենիքի դարպասն է։ Այստեղ սահմանապահ ժողովուրդ է ապրում, որը կրել է բազում դժվարություններ, թշնամու դեմ է կռվել, իր հողի վրա իր արյունն է թափել, բայց մնացել է իր հողի վրա, իր տանը, նախնյաց գերեզմաններին տեր է կանգնել. ֆրանսահայ լրագրող Լեո Նիկոլյանի հետ հարցազրույցում ասել է Տավուշի թեմի առաջնորդ Բագրատ արքեպիսկոպոս Գալստանյանը։
Նիկոլյանն արդեն 1 շաբաթ ապրում է Ոսկեպարում, հետևում է իրադարձություններին, հարցազրույցներ է անում տավուշցիների հետ։
Azg.am-ը ներկայացնում է ֆրանսահայ լրագրողի և Բագրատ Սրբազանի հարցազրույցը։
Տավուշի թեմի առաջնորդն ասել է, որ Հայաստանում կատարվող իրադարձություններն ամբողջ համակարգը փլուզելու մասին է, մարդկանց կյանքն ավերելու, տակնուվրա անելու մասին է։
Սա 3-4 գյուղի մասին չէ՝ Ոսկեպարի, Բաղանիսի, Կիրանցի, Աճարկուտի հարցը չէ, սա ամբողջ Հայաստանի, հայ ժողովրդի գոյության հարցն է։
Ռազմավարական նշանակության ճանապարհներ, գազատարներ, հաղորդակցության միջոցներ կան Տավուշում։
«Սա կյանքի ճանապարհ ապահովող տարածք է Հայաստանի համար։ Երբ նրանք առաջարկում են այլընտրանքային ճանապարհ ստեղծել, նշանակում է անանցանելի ճանապարհներ հնարել երկրի համար։ Չէ՞որ այս ճանապարհը կենսական նշանակություն ունի։ Մարդիկ ջանքեր են գործադրում, որ կարճ ճանապարհներ ձեռք բերեն, իսկ մենք մեր կարճ ճանապարհը տալիս ենք թշնամուն ու երկար, անանցանալի ճանապարհ ենք ստեղծում»,-ասաց Սրբազանը։
Նա ֆրանսահայ լրագրողին պատմել է, որ երբ ՀՀ կառավարության ղեկավարը եկել է Տավուշ, ժողովրդին վախեցրել, ահաբեկել է։
Նրա խոսակցության նյութը ժողովրդին ահաբեկելու, պատերազմով վախեցնելու մասին է եղել։
Մեր տարածաշրջանում ոտքի տեղ անելու կռիվ է գնում, օտարները մեզ փորձում են սիրաշահել, որ իրենց կողմն անցնենք, բայց ամեն ինչ սեփական շահի համար է արվում, ոչ թե Հայաստանին օգնելու. սա երեխային էլ է պարզ։
«Մենք ոչ մեկից ոչինչ չենք սպասում։ Ես բոլորին եմ ասել՝ մեզ հետ ինչ էլ պատահի, ձեր կյանքում ոչինչ չի փոխվելու, դուք նույն կերպ եք ապրելու, հետևաբար, մենք ոչ մեկից սպասելիք չունենք, մեր հարցերը մենք պետք է լուծենք։
Տեսեք, մեր այս տարածաշրջանը թշնամիներով է շրջապատված, հետևաբար, պետք է ապրենք կամ ծառայի, կամ տիրոջ պես։ Պետք է ապրենք՝ մեզ հզորացնելով։
Մեր ակնկալիքն այն է, որ երկրի ղեկավարությունը ժողովրդի իրավունքներին տեր կանգնի, ոչ թե վախեցնի պատերազմով։
Երկրի կառավարիչը վախեցնում է իր ժողովրդին, այն ժողովրդին, որն իրեն քվե է տվել, քվե է տվել երկրի, սեփական անվտանգությունն ապահովելու համար։
Ինքն է այդ քվեն խնդրել ու հրապարակային ասել, որ անկարելի է, որ այստեղ որևէ բան տեղի ունենա։ Հիմա նա խաբում է ժողովրդին։ Ինչո՞ւ. շահե՞ր կան, պարտադրա՞նք կա։
Ինչը փոխվեց 2,5 տարում։ Երբ ասում ես՝ երաշխիք չունեմ, որ այսքանից հետո նորից պահանձջներ չեն լինի, նորից պատերազմ չի լինի։
Ես ասելիք չունեմ էլ…»,- զրույցն ավարտեց Սրբազանը։
