«Երեկ Քպ վարչության որոշմամբ ես հեռացվել եմ կուսակցության շարքերից։
Ուզում եմ իմ կուսակից ընկերներից ներողություն խնդրել իմ վարքով, իմ քայլով չնչին վնաս հասցրած լինելու համար իմ թիմի հեղինակությանը։
Չեմ ուզում, որ իմ գործընկերները լրացուցիչ անգամ դժվարին իրավիճակում հայտնվեն։ Ես ինքս հայտարարում եմ, որ դուրս եմ գալիս Քպ-ից մեծ ցավով, վայր եմ դնում նաև իմ լիազորությունները՝ որպես հաշվիչ հանձնախմբի անդամ։
Իմ անձին վերաբերվելիք գնահատականները բոլորը չէ, որ կստանան պատասխան, որովհետև դրանք շատ կլինեն, բայց էն դեպքերում, երբ որ ես կպատասխանեմ դրանց, դրանք կլինեն մեկ մակարդակ ցածր՝ ոչ հայելային»,- ԱԺ այսօրվա նիստին իր կարճ ելույթում ասաց «Քաղաքացիական պայմանագիր» խմբակցությունից հեռացված պատգամավոր Հովիկ Աղազարյանը։
Հիշեցնենք, որ դեկտեմբերի 3-ին Քպ-ից հայտնել էին, որ Հովիկ Աղազարյանը հեռացվել է «Քաղաքացիական պայմանագիր» կուսակցությունից՝ պետական և կուսակցական նշանակության կոնֆիդենցիալ տեղեկատվության արտահոսքերի, ինչպես նաև հանրության բարոյական նորմերի կոպիտ խախտումների պատճառով։
