Այն մարդիկ, ովքեր պետք է տատիկ-պապիկների աշխատավարձերը բարձրացնեն, այդ մարդիկ պետք է արհեստավարժ լինեն, այսօր կայացած ճեպազրույցի ժամանակ այս մասին ասաց ԱԺ նախագահ Ալեն Սիմոնյանը։
«Այն մարդիկ, ովքեր տատիկ-պապիկների հոսանքի վարձի գործով են զբաղվում, խաղաղություն են բերում ու պետության բոլոր ուղղություններով աշխատում են ու ամեն ինչի մեջ մեղադրվում են, պետք է կարողանան երկիրը ներկայացնեն, նորմալ շոր հագնեն, կարողանան աշխատանքի գնան, և, վերջիվերջո, իրենք պետք է մրցունակ լինեն, որպեսզի նույն պետական հիմնարկում աշխատողը չնախընտրի գնա, մասնավորի մոտաշխատի»,- ասաց նա։
Ըստ Ալեն Սիմոնյանի՝ հենց բարձր աշխատավարձ ստացող պաշտոնյաներն են զինվորականների և ուսուցիչների վարձատրությունը բարձրացնում, և այսօր կան զինվորականներ ու ուսուցիչներ, ովքեր պատգամավորներից ավելի բարձր աշխատավարձ են ստանում։
«Ֆիքսեք՝ պատգամավորի աշխատավարձը պայմանականորեն 1 մլն դրամ է։ Անունը կլինի պարգևավճար, անունը կլինի մեկ այլ բան, դա իր աշխատավարձն է։ Օրենքով չենք ֆիքսում, բայց դա էլ կանենք։ Վարչապետն ասաց, որ սա միջանկյալ լուծում է։ Մենք թափանցիկ ենք, մի հատ ձեր թափանցիկությունից սկսեք (նկատի ունի լրագրողական հանրույթին՝ խմբ.)»,- ասաց Ալեն Սիմոնյանը։
Ի պատասխան դիտարկմանը, որ կառավարության անդամները պետք է բարձր ՕԳԳ ունենան՝ շռայլ պարգևավճարներ ստանալու համար, ԱԺ նախագահը նկատեց՝ քաղաքացիները պետք է գնան և հենց այդ ՕՕԳ-ից ելնելով՝ ձայն տան այս կամ այն ուժին։
«Պարգևատրել բառից եք կառչել, բայց ես ասում եմ ձեզ՝ դա ձևակերպումն է, դա այդ մարդկանց աշխատավարձն է։ Օրենսդրորեն դա կձևակերպենք»,- ասաց Սիմոնյանը։
Հարցին՝ արդյոք ԱԺ-ն, որպես գործադիրի նկատմամբ վերահսկողական գործառույթ ունեցող ինստիտուտ, չի պատրաստվում հաշվետվություն պահանջել նախարարների պարգևավճառների մասով, Սիմոնյանը պատասխանեց.
«Մենք ստանում ենք աշխատավարձ՝ մեր կատարած աշխատանքի համար։ Դա մարդկանց աշխատավարձն է, որը հավաքվել է և տարվա վերջում է տրվել։ Ասեմ ավելին՝ էլի է տրվելու՝ այլ համամասնությամբ»։
