Այս օրը մեզ համար պիտի դառնա ՀԱՂԹԱՆԱԿ կնքելու ուխտի օր

«Այս երկինքը պիտի բերեք երկիր, այնքան սեր, ջերմություն ու բարի կա ձեր սրտերի մեջ, որ մեռցրել եք, թույլ տվեք դուրս գա»,- Հարության տոնի պատարագին հավատացյալներին դիմելով ասաց Տավուշի թեմի առաջնորդ Բագրատ արքեպիսկոպոս Գալստանյանը։

Բոլորով երգեք, մի հատ փակ բերան չտեսնեմ. ժպիիտով բոլորին հորդորեց Սրբազանը։

Երկինքը պետք է բերեք երկիր։ Այնքան ջերմություն, բարիք ու սխրանք կա ձեր սրտերի մեջ, որ մեռցրել եք։ Թույլ տվեք՝ դուրս գա, թույլ տվեք։

․․․Որ մեր կյանքը, իսկապես, երկնքի ու երկրի համբույրը դառնա։

Տավուշի եկեղեցիները շաբաթ օրվանից մարդաշատ են։

Տավուշցիները հետևել են Տեր Բագրատի կոչին ու միով բանիվ մասնակցել Ճրագալույցի պատարագին, հավկիթներով խաղացել, իսկ կիրակի առավոտյան ներկա եղել Սուրբ Հարության պատարագին։

Պատագարգ է մատուցվել նաև Ոսկեպարի եկեղեցում։

Հարության ավետիսով՝ մեր հայացքը ուղղելով դեպի մեր նահատակ զավակները, իրենց ընտանիքները, ուխտ կնքենք երկնքի և երկրի առջև վերստին մեր կյանքը դարձնել հարության և հաղթանակի կյանք. Ասել է Բագրատ Սրբազանը։

Նրա քարոզի առանցքային խոսքերը՝ ստորև.

 Հարության հաղթանակի Ավետիսը մեր որբացած Արցախ աշխարհին։

 Մենք կամ կնույնանանք Հարության հաղթանակի հետ կամ գերեզմանի։

 Ի՞նչ պատգամ ունեմ ես, որ ապրում եմ հարության հաղթանակի խորհրդի մեջ․․․ Սաղմոսի բառերն են վազում մտքիս առջևով՝ թեպետ ընթանամ մահվան հովիտներով, չեմ վախենա չարից, որովհետև Տեր, Դու ինձ հետ ես․․․

Սա հաստատակամ համոզում է և այդպիսին պիտի դառնա մեզ համար, ժողովուրդ, եթե իսկապես մենք ուզում ենք մաքրված, վերափոխված ազգ դառնալ, ո՛չ թափառական՝ թե՛ մտքով, թե՛ հոգով, թե՛ ֆիզիկապես, ո՛չ սովորական, ո՛չ փողոցայնացած, ո՛չ վարքազրկված, ո՛չ արժեզրկված, ո՛չ գաղափարազրկված, ո՛չ հայրենազրկված և ո՛չ էլ Աստվածազրկված

 Բարդ, դժվար ու վճռորոշ ժամանակներ են, և հենց մեր սերունդին է պատիվը տրվել այդ վճռորոշ, բարդ ու դժվար ժամանակները, մեր պարտության ժամանակները դարձնել ոչ թե հանձնվելու, ստորանալու, նվաստանալու ժամանակներ, այլ հակառակը՝ դարձնելու մեզ համար վերելքի, սխրանքի, հերոսության, հաղթանակների և հարության ժամանակներ:

Ոչ մի ուժ չի´ կարող մեզ ընկճել, ճզմել, եթե մեր հավատքը խարսխված է մեր Տիրոջ հարության հաղթանակի վրա։

 Ես հավատում եմ․ ինչպես քչով` ընդամենը 12 առաքյալներով նվաճեցին ամբողջ աշխարհը, մենք էլ մի բռով ու բռունցքով կկարողանանք ոչ միայն հաղթահարել, այլ մեզ վրա եկող բոլոր հարվածները դարձնել կյանքի ճանապարհ։

 Մտքի և հոգու հարձակում․․․ Չի´ ստացվելու, սատանա, չի՛ ստացվելու, չարիք, չի՛ ստացվելու, մի՛ փորձիր։ Որքան էլ քո մահվան ստվերներն ու հովիտները լույսի տեսքով ներկայանան մեզ, չե՛ն կարողանալու հաղթել մեզ, որովհետև մեր Տեր Աստվածն է մեզ հետ․․․

 Նայե´ք ձեր զավակների աչքերի մեջ․․․ այս երեխաներին ու իրենցից հետո եկողներին մենք պատասխան պիտի տանք․․․ որոշումներ կայացնելու ժամանակն է․․․

 Մեր կյանքի լուծումը մեր ձեռքերի մեջ է, միայն թե ճշմարտությունն ու արդարությունը դառնան մեր կյանքի սկզբունքը։

 Դեռ սպառնում են մեզ: Մեր կյանքի վճռական ժամանակն է, և մենք ասելիք ունենք այդ ժամանակի մեջ, և անելիք ունենք այդ ժամանակի մեջ․․․

 Ժողովուրդ, ժամ տվեք ձեզ, մտածե՛ք: Թույլ մի տվեք թշնամին մտածի ձեր փոխարեն․․․

 Այս օրը մեզ համար պիտի դառնա ՀԱՂԹԱՆԱԿ կնքելու ուխտի օր։