Այո՛, թող դա լինի այդպես, և Նիկոլ Փաշինյանը համարվի խաղաղության խորհրդանիշ. Ալեն Սիմոնյան
Այսօր Հայաստանի քաղաքական դաշտում երկու օրակարգ կա. մեկը խաղաղությունն է, մյուսը՝ պատերազմը, այսօր լրագրողների հետ ճեպազրույցում հայտարարեց ԱԺ նախագահ Ալեն Սիմոնյանը՝ պատասխանելով այն հարցին, թե ինչի հիման վրա է վարչապետ Նիկոլ Փաշինյանը պնդում, որ եթե ՔՊ-ն սահմանադրական մեծամասնություն չկազմի, սեպտեմբերին պատերազմ կսկսվի։
«Մեկն ինչ-որ պահանջներ է հարևանների նկատմամբ, մյուսը տարածաշրջանում խաղաղություն հաստատելն է։ Ոչ թե Նիկոլ Փաշինյանի հետ է պայմանավորվածությունը, այլ օրակարգի, քաղաքական տեսլականի, քաղաքական դիրքորոշման մասին է։ Եթե դուք դա կենտրոնացնում եք Նիկոլ Փաշինյանի անձի շուրջ, ապա այո՛, թող դա լինի այդպես, և Նիկոլ Փաշինյանը համարվի խաղաղության խորհրդանիշ։ Ես դրան ընդհանրապես դեմ չեմ»,-ասաց նա։
Դիտարկմանը, որ Փաշինյանը պատերազմի կոնկրետ ժամկետ է նշում ընթացիկ տարվա սեպտեմբեր ամիսը, ԱԺ նախագահն արձագանքեց.
«Քաղաքական գործիչները նաև կարողանում են քաղաքական վերլուծություններ անել և դրա իրավունքն ունեն, և վարչապետը, որպես առաջին քաղաքական գործիչներից մեկը Հայաստանի Հանրապետության, դրա իրավունքն ունի, և դա գնահատական է։ Ի դեպ, ասեմ, որ ընդիմադիր դաշտի ներկայացուցիչների կողմից էլ է նման բան բարձրաձայնվել և բարձրաձայնվել է ամեն տարի և ամիսով են ասել։ Մեր պատգամավորները Ազգային ժողովի ամբիոնից ասում էին՝ պատերազմ է, պատերազմ է։ Ընդ որում, խաղաղության պարագայում էին ասում պատերազմ է, ինչի՞ եք զարմանում ի՞նչն է այդտեղ տարօրինակ»։
