Մարզերում մեր հանդիպումների ժամանակ մարդիկ ասում են շնորհակալություն. մեծ հույս ունեն, որ այս ուղղությունը կշարունակվի։ Մենք էլ իրենց ի պատասխան ասում ենք, որ իրենք պետք է տեր կանգնեն խաղաղությանը, և իրենք էլ պատրաստակամություն են հայտնում տեր կանգնել խաղաղությանը։ Սրանք են մեր հիմնական խոսակցության թեզերը։ Այս մասին այսօր լրագրողների հետ զրույցում նշեց ԱԺ նախագահ Ալեն Սիմոնյանը։
«Նաև շնորհակալություն են հայտնում ճանապարհների, դպրոցների, բժշկական ապահովագրության համար։ Շատ-շատ-շատ մարդ օգտվել է, շատ հաճելի է, որ համակարգն աշխատել է, և շատ մարդիկ արդեն օգտվել են դրանից։ Թոշակների համար են շնորհակալություն հայտնում և պահանջում են մեզանից որոշ ընդդիմադիր գործիչներին հնարավորինս շուտ ինչ-որ ձևով լռեցնել։ Ինձ ասում են՝ պատգամավորներ կան, չեն գալիս գործի, ինչի՞ չեք հանում գործից։ Ես բացատրում եմ, որ դրա իրավունքը չկա և այլն։ Լրիվ քաղաքականացված խոսակցություններ են տեղի ունենում»,- նշեց Ալեն Սիմոնյանը։
Հարցին՝ իսկ խոսք լինո՞ւմ է այն մասին, որ սեպտեմբերին կարող է լինել պատերազմ և դա ժողովուրդը որպես ի՞նչ է դիտարկում՝ որպես սպառնալի՞ք, որպես շանտա՞ժ, որպես զգուշացո՞ւմ, Ալեն Սիմոնյանը պատասխանեց.
«Քաղաքական գործիչները քաղաքական վերլուծություններ են կարողանում անել, իսկ երկրի վարչապետն, ունենալով ինֆորմացիա, տիրապետելով ամբողջ պրոցեսներին, կարող է նման կանխատեսում անել։ Ես նաև նշեցի, որ մեր ընդդիմադիր գործիչները նույն բանն են ասել, նույնիսկ խաղաղության պայմաններում։ Հիմա երբ վարչապետը նույն բանն է ասում, արդեն ավելի հիմնավոր ձևով, ձեր մոտ դա զարմա՞նք է առաջացնում։
Բա մարդիկ մեզ ինչո՞ւ են ասում՝ շնորհակալություն խաղաղության համար։ Մարդկանց երեխաները չեն մահանում, մարդը ավելի քիչ անհանգիստ է, երբ որ իր երեխան զորակոչվում է բանակ և այլն։ Բա ո՞նց չխոսեն մարդիկ, իհարկե խոսում են դրա մասին։
Մարդիկ մեզ ասում են՝ սրանց էջը շուտ արեք, փակեք, պրծնենք մենք այս խոսակցությունից, սա են ասում»։
