Լրագրողների՝ Փաշինյան-Էրդողան ջերմ շփումների վերաբերյալ հարցն այսօր հունից հանեց Էկոնոմիակայի նախարար Գևորգ Պապոյանին։
Լսելով Նիկոլ Փաշինյանի՝ հրճվանքով էրդողանի գիրքը կրծքին սեղմած լուսանկարի մասին հարցը՝ նա նշեց, որ հարկ չի համարում պատասխանել։
«Ձեր հարցն այնպիսին է, որ ես ուղղակի նպատակահարմար չեմ համարում դրան պատասխանել»,- ասաց նախարարը։
Դիտարկմանը, որ ՀՀ երկրորդ նախագահ Ռոբերտ Քոչարյանի գիրքը գրկողներին ինքը ժամանակին թունդ որակումներ էր տալիս, արդյոք խնդիր չէ երկրի ղեկավարի՝ Էրդողանի գրքով նկարվելը, Պապոյանը պատասխանեց.
«Իսկ ի՞նչ եք դուք առաջարկում, որ Հայաստանն իր հարևանների հետ դիվանագիտական հարաբերություններ չհաստատի՞, Հայաստանն իր քաղաքականությամբ թշնամա՞նք ստեղծի»։
Գևորգ Պապոյանը միաժամանակ շեշտեց՝ այն, ինչ արվում է ՀՀ կառավարության ու Նիկոլ Փաշինյանի կողմից, արվում է այն բանի համար, որ Հայաստանում լինի խաղաղություն և տնտեսական բարգավաճում, կյանքի կոչվի խաղաղության խաչմերուկ նախաձեռնությունը:
Նրա խոսքով՝ նախկին իշխանությունների վարած քաղաքականության արդյունքում է, որ Հայաստանն այսօր շրջափակված է, երկրում 30 տարի տնտեսությունը չի զարգացել, ժողովրդավարություն չի եղել։
«Այդ քաղաքականության արդյունքում է, որ Հայաստանում 10-15 օլիգարխ է եղել, մնացած ժողովուրդն ապրել է աղքատության մեջ։ Այդ քաղաքականության արդյունքում տեղի ունեցան նաև ՀՀ կորուստները։ Նախկինները վայ հայրենասիրություն էին քարոզում, լրագրողներին վճարում էին»,- ասաց նա։
Երբ լրագրողները ՔՊ-ական նախարարին հիշեցրին իր անցյալը, որ նա տարիներ շարունակ ՀՀԿ-ական է եղել, նա դրանից ավելի վրդովվեց։
