Ցանկացած տնտեսական խոշոր գործարք, որը մանավանդ վերաբերում է երկրի խոշորագույն բանկերից մեկին, նաև քաղաքական գործարք է, քաղաքականություն է , Azg.am-ի թղթակցի հետ զրույցում ասաց վերլուծաբան Ստեփան Դանիելյանը՝ անդրադառնալով Bank of Georgia Group PLC-ի կողմից «Ամերիաբանկ»-ը ձեռք բերելու փաստին։
Մեր զրուցակիցը, սակայն, դժվարացավ հաստատապես պնդել, որ «Ամերիաբանկ»-ի վաճառքը կարող է նպաստել ԱՀ նախկին պետնախարար Ռուբեն Վարդանյանի՝ ադրբեջանական գերությունից հնարավորինս արագ վերադարձին։
«Կարծում եմ՝ ոչ ոք չի կարող պատասխանել այն հարցին՝ արդյոք Ռուբեն Վարդանյանի ազատարձակման մասով ինչ-որ պայմանավորվածություններ կան, թե ոչ։ Այս մասով կարելի է միայն ենթադրություններ անել»,- ասաց Ստեփան Դանիելյանը՝ միաժամանակ հավելելով, որ ենթադրությունների դաշտում է նաև այն հարցը, թե տնտեսական խոշոր գործարքից որքան հետո ի հայտ կգան դրա հետ կապակցված քաղաքական զարգացումներ։
Հիշեցնենք, որ Bank of Georgia Group PLC-ն համաձայնություն է ձեռք բերել հայկական Ամերիաբանկը մոտ 303,6 մլն դոլարով գնելու վերաբերյալ, ասվում է Bank of Georgia Group-ի հաղորդագրության մեջ։
Գործարքից հետո բանկի բաժնետոմսերի 10%-ը կշարունակի պատկանել Վերակառուցման և զարգացման եվրոպական բանկին։
Հիշեցնենք, որ «Ամերիաբանկ»-ն ավելի վաղ հաստատել էր՝ իր բաժնետոմսերը կգնի «Վրաստանի բանկը»` Լոնդոնի ֆոնդային բորսայում գրանցված «Bank of Georgia Group»-ը։
«Վրաստանի բանկ» ընկերության մամուլի ծառայությունն իր հերթին ավելի վաղ տեղեկացրել էր, որ «Bank of Georgia Group PLC»–ը 303,6 մլն դոլարով կգնի «Ամերիաբանկը»
Ըստ «Ամերիաբանկի» հաղորդագրության` գործարքի համաձայն` խումբը կդառնա «Ամերիաբանկի» հիմնական բաժնետեր: Բանկում իր բաժնեմասնակցությունը 10%-ի չափով կպահպանի նաև Վերակառուցման և զարգացման եվրոպական բանկը (ՎԶԵԲ)։
Ֆինանսական ծառայությունները վերահսկող բրիտանական մարմինը (Financial Conduct Authority, FCA) արդեն հաստատել է ֆինանսական գործարքի շրջաբերականը։ Գործարքը պետք է հաստատվի կողմերի ընդհանուր բաժնետերերի ժողովների, ինչպես նաև հավանության արժանանա կարգավորող մարմինների, այդ թվում`ՀՀ կենտրոնական բանկի կողմից։
«Գործարքի վերջնական հաստատումից հետո «Ամերիաբանկը»` որպես խմբի ինքնուրույն լիիրավ և լիարժեք իրավունակությամբ ընկերություն, կշարունակի բիզնեսի ընդլայնումն իր բրենդի ներքո և գործող ղեկավար թիմի առաջնորդությամբ»,– ասված է հաղորդագրությունում։
«Bank of Georgia Group»–ի բաժնետերերի ցանկում են աշխարհի խոշորագույն ֆինանսական ընկերություններից «JP Morgan»-ը, «BlackRock»-ը, «Vanguard Group»-ը, «Schroders»-ը, «Norges Bank Investment Management»-ը և այլն:
Հիշեցնենք, որ այժմ «Ամերիաբանկի» բաժնետերերն են «Իմաստ Գրուպ» ընկերությունը (նախկին «Ամերիա Գրուպը», որի բաժնետոմսերի 48,82%–ը հիմնադրվել է Ռուբեն Վարդանյանի կողմից), Վերակառուցման և զարգացման եվրոպական բանկը (17,71 %), Ասիական զարգացման բանկը (13,91 %), ինչպես նաև «ESPS Group»–ը, որում ընդգրկված են «Ameria Group»–ի մի շարք մենեջերներ (12,05%):
2023 թ. տարեվերջի դրությամբ «Ամերիաբանկի» ակտիվները կազմել են 1 տրլն 410 մլրդ դրամ։ Ակտիվների ծավալով բանկը տարիներ շարունակ ՀՀ–ում առաջատարն էր, սակայն վերջին տարիներին առաջատարին դիրքերը զիջել է Արդշինբանկին:
