Մերձավոր Արևելքում անընդհատ գրանցվող բախումներն ու զարգացումները տարածաշրջանը բավական խոցելի են դարձնում, իսկ դա ենթադրում է, որ հավանական ռազմական նոր բախումների կամ էսկալացիաների ժամանակ կարող են նաև մեր հարևան Իրանն ու Ադրբեջանը խառնվել․ այսպիսի տեսակետ Պաշտպանության նախկին փոխնախարար, ՀՀԿ-ական Արտակ Զաքարյանն է հայտնում՝ նկատելով, որ եթե վերոնշյալ սցենարը զարգանա, ապա այդ ամենը մեր երկիրն էլ ավելի խոցելի կդարձնի։
Նրա համոզմամբ՝ եթե տարածաշրջանում իրավիճակը խիստ լարման հասնի, ապա Հայաստանը թե՛ դիվանագիտական, թե՛ ռազմաքաղաքական տեսանկյունից չի կարողանա դիմադրություն ցույց տալ․ դրան պարզապես պատրաստ չէ։
Զաքարյանը վստահ է, որ իշխող «Քաղաքացիական պայմանագիր» կուսակցությունն Արցախյան հիմնահարցը փակուղի է մտցրել։ «Արցախյան հարցի համար անգամ լուծում չեն թողել, ու առանց լուծման էլ, ասել է թե՝ առանց ստատուս-քվոյի և խաղաղության իրական տեսլականի՝ թե՛ Հայաստանի, թե՛ ԱրցախիՀհանրապետություններն առուծախի առարկա են դարձրել՝ միայն թե ատամներով պահեն-պաշտպանեն իրենց իշխանությունը»,- ընդգծում է նախկին պաշտոնյան։
Խոսելով ռուս-ուկրաինական հակամարտությունից՝ համոզմունք է հայտնոմ, որ այն ինչքան երկարի, դրանից միայն Հայաստանի անվտանգային միջավայրն է թուլանալու։
Ս․Վ․
