Հայաստանի և Ադրբեջանի ղեկավարները հաստատել են երկու երկրների սուվերենությունն ու տարածքային ամբողջականությունը, և ես ողջունում եմ ձեր վարչապետի համարձակ հայտարարությունները, որոնք խաղաղության ուղին են բռնել։ Յուրաքանչյուր պետության պարտավորությունն է իր բնակչության իրավունքը պաշտպանել։ Հայ բնակչության անվտանգությունն ու իրավունքը պետք է պաշտպանվեն, և ես իմ ադրբեջանցի գործընկերոջը կհիշեցնեմ սրա մասին. ՀՀ արտգործնախարարի հետ համատեղ մամլո ասուլիսում ասաց Բելգիայի արտգործնախարար Հաջա Լահբիբը։
Նշենք, որ հայաստանյան այցից անիմիջապես հետո նա մեկնելու է Բաքու։
Խաղաղության համաձայնագրի կնքումը մոտ է, երկու երկրների ղեկավարները պետք է ամեն ինչ անեն, որպեսզի հայ և ադրբեջանցի ժողովուրդներին թույլ տան ապրել խաղաղության մեջ. նշեց Լահբիբը։
«Դրան հասնելու համար կարող եք ձեր հույսը դնել Եվրամիության վրա։ Բելգիան խորապես մտահոգված է հումանիտար իրավիճակով ու դրա վատթարացմամբ։ Լաչինի միջանցքով տեղափոխումների սահմանափակումը սովահարության, հիվանդությունների լուրջ սպառնալիք է առաջացնում։
Բելգիան ընդունում է Եվրամիության դիրքորոշումը՝ Ադրբեջանի պարտավորությունն է ապահովել Ղարաբաղի բնակչության անվտանգությունը և Լաչինի միջանցքով ազատ տեղաշարժը։ Բելգիան կշարունակի դիվանագիտական շփումներում պնդել սա և գործել այս ուղղությամբ»,- ասաց Բելգիայի արտգործնախարարը։
2024 թվականի հունվարի 1-ից Եվրամիության ղեկավարությունը ստանձնելու է Բելգիան։
Բելգիացի դիվանագետը նշեց, որ Հայաստանը կարևոր գործընկեր է, և Հայաստանի՝ կոռուպցիայի դեմ պայքարում Եվրամիությունը միշտ պատրաստակամ է աջակցել։
«Մենք ողջունել ենք Նիկոլ Փաշինյանի համարձակ հայտարարությունը, որով նա ճանաչել է Ադրբեջանի տարածքային ամբողջականությունը։ Մենք կոչ ենք անում Ադրբեջանի ամենաբարձր իշխանություններին նույնն անել։ Տարբեր երկրներ են ներգրավված այս գործընթացներում՝ Ռուսաստան, Իրան, ԱՄՆ, ԵՄ. բանակցություններ միշտ են ընթանում, պակասում է բանակցություններում կայացված որոշումները տեղում իրագործելու կամքը։ Դեմ առ դեմ հանդիպումների ժամանակ մենք ընդգծել ենք փորձագետների, հանձնաժողովների ներկայության անհրաժեշտությունը, որը կկարողանա վերջ տալ թշնամանքին ու երկու ժողովուրդների իրական հաշտեցման, փոխվստահության հնարավորություն կտա»,-ելույթն ավարտեց Հաջա Լահբիբը։
