Մեր 150-200 տարվա պարտությունների սկզբնաղբյուրը Լոնդոնն է, որովհետև Ռուսաստանի թիվ մեկ մրցակիցը ժամանակին Մեծ Բրիտանիան էր, այժմ՝ Մեծ Բրիտանիան և Միացյալ նահանգները, «Արցախի համար» նախաձեռնող խմբի՝ Մեծ Բրիտանիայի դեսպանատան առջև այսօր կազմակերպած բողոքի ակցիայի ժամանակ ասաց ռազմական վերլուծաբան Հայկ Նահապետյանը։
«Նրանք Թուրքիայի ձեռքով Ռուսաստանի հարավում ավեր էին գործում, պատերազմներ սանձազերծում։ Իսկ մենք Ռուսաստանի դաշնակիցն ենք եղել, 200 տարի առաջ նրա օգնությամբ մեր տարածաշրջանում հայկական էթնոսը կայացել է։
Կարծում եմ՝ Մեծ Բրիտանիան և իր հատուկ ծառայությունները 44-օրյա պատերազմի թիվ մեկ շահառուն էին, Թուրքիան և Ադրբեջանն ընդամենը գործիք էին»,- նշեց Հայկ Նահապետյանը։
Նրա համոզմամբ՝ ամենևին պատահական չէ, որ Մեծ Բրիտանիայի ստվերային կառավարության իրական ղեկավարներից մեկը՝ այդ երկրի գաղտնի հետախուզական ծառայության ղեկավար Ռիչարդ Մուրը, նախկինում զբաղեցրել է Թուրքիայում Մեծ Բրիտանիայի նախկին դեսպանի պաշտոնը, և նրա կինը թրքուհի է։
«Պատահական չէ նաև տնտեսական շահը։ Մեր տարածաշրջանը ոչ միայն ոսկու, այլ նաև ուրանի հանքերով է հարուստ, իսկ ուրանը մարդկության էներգետիկ ապագայի հիմնական աղբյուրն է լինելու, և մեծբրիտանական ընկերությունները փորձում են այստեղ իրենց իշխանությունը հաստատել։ Պատահական չէ նաև, որ Արցախում գտնվող երկու հանքներն ամռան ընթացքում գնվել են մեծբրիտանական ընկերության կողմից։
Այսքանով հանդերձ՝ մենք պետք է հասկացնել տանք, որ հրաշալի պատկերացնում ենք՝ որ երկիրն է այս ավերը գործում։ Ելք կա, և Արցախի իշխանությունները կարող են ձախողել Մեծ Բրիտանիայի բոլոր ցանկությունները։
Այն, ինչ մենք պետք է անենք, պետք չէ այլոց գրպանը գցել։ Խնդիրներ առաջանալու ժամանակ խելացիները ելքեր են փնտրում, հիմարները՝ մեղավորների, և ՀՀ իշխանությունները 44-օրյա պատերամզից մինչև հիմա մեղավորներ են փնտրում»,- ասաց ռազմական փորձագետը՝ շեշտելով, որ հայկական սփյուռքի, Արցախի և Հայաստանի միասնականության արդյունքում շատ խնդիրներ կարող են լուծվել։
Հիշեցնենք, որ «Արցախի համար» նախաձեռնող խումբն այսօր բողոքի ակցիա է կազմակերպել Երևանում Մեծ Բրիտանիայի դեսպանատան առջև՝ վստահ լինելով, որ ինչպես 44-օրյա պատերազմի, այնպես էլ Արցախի շրջափակման գլխավոր պատվիրատուն ու մեղավորը Մեծ Բրիտանիան է։
Նախաձեռնող խմբի անդամների համոզմամբ՝ այդ երկիրը մեր տարածաշրջանում ունի ոչ միայն քաղաքական, այլև հանքարդյունաբերական շահեր՝ ի դեմս նաև Արցախում Դրմբոնի և Կաշենի հանքերի։
Ցուցարարներն ամբողջ ակցիայի ընթացքում ակնկալել են, որ կհանդիպեն Մեծ Բրիտանիայի դեսպան Ջոն Գալագերի հետ՝ դեմ առ դեմ զրուցելու վերջինիս հետ, բայց աշխատանքային օրվա աշխատանքային ժամին դեսպանատան դուռը փակ է եղել, աշխատողներ դեսպանատանը չեն եղել։
Ակցիայի ավարտին ցուցարարները բողոքի նամակը դրել են դեսպանատան փակ դռան արանքում՝ հուսալով, որ դեսպանը կկարդա իր երկրին ուղղված մեղադրանքները։
Մանրամասն՝ տեսանյութում։
