Ռուսաստանը փորձում է իր պարտականությունները չկատարելու մեղքը գցել հայկական կողմի վրա։ Դա ակնհայտ է. դրա համար պետք է ընդամենը հիշել, որ նախևառաջ Ռուսաստանն ինքը Արցախը ճանաչել է Ադրբեջանի կազմում՝ նախքան ՀՀ վարչապետ Նիկոլ Փաշինյանը դա կաներ Պրահայում։ Azg.am-ի թղթակցի հետ զրույցում այս մասին ասաց քաղաքագետ Արմեն Բաղդասարյանը՝ անդրադառնալով ՌԴ ԱԳՆ պաշտոնական ներկայացուցիչ Մարիա Զախարովայի հայտարարությանը։
Հիշեցնենք՝ վերջինս ճեպազրույցի ժամանակ հայտարարել էր՝ «Այն բանից հետո, երբ Հայաստանի ղեկավարությունը ճանաչեց Լեռնային Ղարաբաղը որպես ադրբեջանական, ջանքերի բացակայության մասին Ռուսաստանի դեմ ցանկացած պնդում անտեղի է»։
«Ռուսաստանը չի կատարել իր պարտավորությունները՝ մասնավորապես նոյեմբերի 9-ի փաստաթղթի մի շարք կետերով, օրինակ՝ ռազմագերիների վերադարձի։ Չմոռանանք նաև, որ ռուս խաղաղապահների ներկայությամբ ադրբեջանցիներն ագրեսիա են իրականացրել Փառուխում, Քարագլխում, Խծաբերդում և այլն։ Հիմա այդ ամենը կապել նրա հետ, թե Հայաստանն Արցախը ճանաչեց Ադրբեջանի կազմում, դա է պատճառը, այդքան էլ այդպես չէ։
Այսինքն՝ խոսքն այն մասին չէ, որ ՀՀ իշխանություններն այստեղ մեղք չունեն, խոսքն այն մասին է, որ Ռուսաստանն իր պարտավորությունները չի կատարել, հիմա էլ չի կատարում և պարզապես փորձում է մեր հաշվին Ադրբեջանի հետ հարաբերությունները կարգավորել՝ մեղքը բարդելով հայկական կողմի վրա։ Սա բացարձակապես անընդունելի է։ ՌԴ-ում էլ շատ լավ գիտակցում են սա։ Պարզապես հաշվի առնելով ՀՀ ներքաղաքական իրավիճակը, էմոցիոնալ լարված ֆոնը՝ փորձում են Հայաստանում ակնհայտորեն բարձրացող հակառուսական ալիքի դեմն առնել»,- ասաց քաղաքագետը։
Անդրադառնալով Մարիա Զախարովայի բարձրացրած հարցին՝ արդյոք ռուս խաղաղապահների դուրսբերումը Նիկոլ Փաշինյանի ցանկությունն է, Արմեն Բաղդասարյանը նկատեց՝ սա բաց տեքստով շանտաժ է, որ եթե հայկական կողմը շարունակի ՌԴ-ի հասցեին քննադատություններ հնչեցնել, Ռուսաստանն Արցախից դուրս կգա։
«Ռուս խաղաղապահների առնչությամբ հայկական կողմի դժգոհություններն օբյեկտիվ հիմք ունեն։ Մյուս կողմից ես վստահ եմ, որ ռուս խաղաղապահներն Արցախում հայտնվել են ոչ թե հայկական կամ ադրբեջանական, այլ սեփական շահերը պաշտպանելու նպատակով՝ ընդհուպ հասնելով Արցախում ռազմական կոնտինգենտ ունենալուն։ Այսինքն՝ պետք է չէ մանիպուլյացիաներ անել, ներկայանալ որպես փրկիչ, որովհետև Ռուսաստանը միշտ հայտնվում է՝ ոչ թե ինչ-որ մեկին փրկելու, այլ սեփական շահերը հետապնդելու համար, և ցավոք, դա լինում է կողմերից մեկի, այս դեպքում՝ հայկական կողմի հաշվին»,-ամփոփեց քաղաքագետը։
