«Այն ճանապարհը, որը պետք է բացվի, ուղիղ ու պատասխանատու կերպով հայտնում եմ, որ Հայաստանի ու Սյունիքի համար ոչ մի սպառնալիք չի ստեղծում․ ընդհակառակը՝ ճանապարհի բացումը կբերի կայունության և անվտանգության լրացուցիչ երաշխիքներ։ Այլ բան, որ Ադրբեջանի խոսույթի մեջ մտնում են արտահայտություներ, նախաձեռնություններ, որոնք բացահայտում են որոշակի վտանգներ։ Օրինակ՝ խոսում են միջանցքի մասին։ Ես ուզում եմ հստակ լինի, որ Հայաստանի Հանրապետության տարածքով որևէ միջանցք որևէ մեկին չենք տալու։ Բայց մենք ճանապարհ տալու ենք, ճանապարհ բացելու ենք, և պատրաստ ենք դա անել ցանկացած պահի։
Ճանապարհների բացումը ոչ միայն սպառնալիք չէ ՀՀ-ի համար, այլև օգտակար է։ Ադրբեջանի համար էլ է օգտակար, Թուրքիայի համար էլ։
Բայց Ադրբեջանն ուզում է, որ այդ կոմունիկացիաները բացվեն այնպես, որ Հայաստանը մնա շրջափակման մեջ։ Այ դա սպառնալիք է, երբ ճանապարհները բացվեն, Ադրբեջանը կոմունիկացիաներից օգտվելու հնարավորություն ունենա, իսկ Հայաստանը չունենա։
Տարածաշրջանային կոմունիսկացիաների բացում ասելով՝ նշանակում է մեր պատկերացմամբ, որ Հայաստանն Ադրբեջանի տարածքով երկաթուղային կապ է ստանում Ռուսաստանի հետ։ Նաև ավտոմոբիլային կապ Ադրբեջանի տարածքով Ռուսաստանի հետ»,- Վլադիվոստոկում հայ համայնքի հետ հանդիպման ժամանակ ասել է Հայաստանի վարչապետ Նիկոլ Փաշինյանը։
Նա սպառնալիք Ադրբեջանի կողմից տեսնում է սահմազատման ու սահմանագծման գործընթացի հետ կապված։
«Միջազգային հարթակներում Ադրբեջանը հայտարարում է, որ ոչ մի տարածքային պահանջ չունի Հայաստանից, բայց երբ օգտագործում է «Արևելայն Զանգեզուր» արտահայտությունը, բնականաբար, նկատի է ունենում, որ գոյություն ունի նաև «Արևմտյան Զանգեզուր»։ Այս ամեն ինչի տակ թաքնված նկրտումներ կան»,- ասել է Փաշինյանը։
Նա խոսել է սահմանագծման ու սահմանազատման բարդություններից. «Տարբեր կարծիքներ կան, թե սահմանզատումն ու սահմանազատումը որ թվականի քարտեզների հիման վրա պետք է լինի, իսկ մենք ասում ենք, որ այդ գործընթացը պետք է տեղի ունենա իրավական ուժ ունեցող փաստաթղթերի հիման վրա։ Քարտեզը նկար է, որում արտահայտված են իրավական ուժ ունեցող որոշումները։ Մենք հիմա կարող ենք հավաքվել, մի քարտեզ նկարել։ Այդ քարտեզն ինչքանո՞վ ունի իրավական ուժ, դա է կարևորը»։
