Քաղաքագետ, «Հայաքվե» նախաձեռնող խմբի անդամ Ալեքսանդր Մանասյանը խորին համոզմունք ունի, որ իրենց նախաձեռնած ստորագրահավաքը հաջողելու է, և անհրաժեշտ 50 հազար ստորագրությունը վերջնարդյունքում առանց դժվարության՝ հավաքվելու։
«Հույս ունենք, որ հայ հասարակության մեջ 50 հազար առողջ դատող մարդ կգտնվի։ Բացի այդ՝ մեր այս նախաձեռնության մեջ որևէ վտանգավոր հետևանք չկա. արդեն ունենք 1992 թվականին ԱԺ-ի կողմից ընդունած որոշում, որով ամրագրված է, որ Լեռնային Ղարաբաղն Ադրբեջանի կազմում չի կարող լինել։ Մեր նախաձեռնությունն այս որոշման շարունակությունն է։
Մեր նախաձեռնությունը ո՛չ հների, ո՛չ նորերի համար վտանգ չի ներկայացնում և իսկապես հանուն Արցախի փրկության է»,- Azg.am-ի թղթակցի հետ զրույցում ասաց քաղաքագետը։
Հարցին՝ ի՞նչ արձագանքներ են ստանում Արցախից, արդյոք արցախցին հույս է կապում այս նախաձեռնության հետ, Ալեքսանդր Մանասյանը պատասխանեց՝ մարդիկ մտավախություն ունեն՝ չլինի, թե ստորագրահավաքի ընթացքում հանկարծ արհեսատական ինչ-որ խոչընդոտներ առաջանան, սակայն ինքը հույս է տածում, որ գործընթացը հարթ կընթանա։
Թեև քաղաքագետը, որպես նախաձեռնող խմբի անդամ, դեռևս չի հասցրել անձամբ լինել սահմանված հասցեներում և հետևել ստորագրահավաքի բուն ընթացքին, սակայն նախաձեռնող խմբի մյուս անդամները լուրջ խոչընդոտների մասին իրեն չեն հայտնել։
Ալեքսանդր Մանասյանը հիշեցրեց նաև մեկ այլ միջազգային նախաձեռնության մասին, որի անդամ է ինքը, և որը նպատակ ունի ճանաչելու Արցախի անկախությունը։
«hayk.world կայքում մի քանի լեզվով Արցախի անկախության ճանաչման անհրաժեշտության պատմաիրավական հիմնավորումներ են ներկայացված։ «Ես ճանաչում եմ Արցախի Հանրապետությունը» կարգախոսով դիմում ենք անհատներին։ Սա միջազգային նախաձեռնություն է, որը հույս և նպատակ ունի միլիոնավոր ստորագրություններ հավաքելու»,- ասաց մեր զրուցակիցը։
Հիշեցնենք, որ «Հայաքվե» նախաձեռնության ստորագրահավաքը մեկնարկել է երեկվանից։ Խոսքը ՀՀ քրեական օրենսգրքում լրացում կատարող մի նախագծի մասին է, համաձայն որի Հայաստանի Հանրապետության անունից Արցախը Ադրբեջանի մաս ճանաչող պաշտոնատար անձը պատժվում է 10-ից 15 տարի ազատազրկմամբ։
Ըստ այդմ՝ անհրաժեշտ է ՀՀ 50 հազար քաղաքացու ստորագրություն, որպեսզի այս առաջարկությունը քննարկվի ՀՀ Ազգային Ժողովում։
