Վերլուծաբան Ստեփան Դանիելյանի համար զարմանալի է, որ ՀՀ վարչապետ Նիկոլ Փաշինյանի՝ միայն երեկվա ասուլիսից հետո է որոշ մարդկանց շրջանում տպավորություն ստեղծվել, որ վերջինս պատրաստվում է հերթական անգամ Ադրբեջանին տարածքներ զիջել։
«Եթե հետևենք այդ անձի և ՀՀ գործող իշխանության ներկայացուցիչների՝ առնվազն վերջին մեկ տարվա խոսույթին, ապա կհասկանանք, որ այդ ամենը շատ բացահայտ է։ Բացահայտ է, որ նրանք ոչ միայն Տավուշի մի քանի գյուղ են զիջելու, այլ նաև՝ ուրիշ տարածքներ ևս»,- Azg.am-ի թղթակցի հետ զրույցում ասաց վերլուծաբանը։
Ստեփան Դանիելյանի խոսքով՝ տարածքներ զիջելն Ադրբեջանի ուղիղ պահանջն է, և այդ երկրի բազմաթիվ պաշտոնյաներ տեղական լրատվամիջոցների հետ զրույցներում բացահայտ հայտարարում են, որ Նիկոլ Փաշինյանը վաղուց է Հայաստանի Հանրապետությունից տարածքներ զիջել։
«Նրա վերջին ելույթներից պարզ էր, որ զիջել է, և դրանք վերջին զիջումները չեն։ Հաջորդ փուլում Ադրբեջանի ռազմական ուժերն ուղղակի մտնելու են Հայաստանի Հանրապետության տարածքներ և դե ֆակտո վերցնելու են դրանք։
Դրա իրավական հիմքը Նիկոլ Փաշինյանը վերջնականապես ստեղծեց արդեն երեկվա ելույթի ժամանակ՝ նաև իջեցնելով 29 800 ք/կմ թիվը (երեկվա ասուլիսի ընթացքում վերջինս նշել էր, որ ՀՀ տարածքի 29,800 ք/կմ կլորացրած թիվ է, կա ուրիշ թիվ՝ 29,743 ք/կմ՝ խմբ.)։ Այսինքն՝ Նիկոլ Փաշինյանն այսկերպ պաշտոնապես լեգիտիմացրեց Ադրբեջանի պահանջները, որ այդ երկրի զինված ուժերն ուղղակիորեն մուտք գործեն այդ տարածքներ և ոչ միայն այդ տարածքներ։
Հաջորդ փուլում ևս Ադրբեջանը տարածքներ է վերցնելու՝ հաշվի չառնելով ո՛չ Արծվաշենի անկլավի չափերը, ո՛չ մինչ այս իրենց գրաված տարածքները։ Ադրբեջանն իր գործողությունները կատարում է, իսկ սրանք լեգիտիմացնում են այդ գործողությունները»,- ասաց մեր զրուցակիցը։
Ստեփան Դանիելյանը միաժամանակ հիշեցրեց՝ նույնը տեղի ունեցավ Գորիս-Կապան ճանապարհին, երբ Նիկոլ Փաշինյանը հրապարակային կերպով սկսեց օգտագործել հայկական գյուղերի ադրբեջանական տեղանունները։
«Սա արդեն Ադրբեջանին հիմք տվեց պնդելու, այդ թվում ՝միջազգային հանրության առջև, որ ինքը ճիշտ է։ Հիմա նույնն է կատարվում, և դա շարունակվելու է այնքան ժամանակ, քանի դեռ սրանք իշխանության ղեկին են լինելու»,- ամփոփեց վերլուծաբանը։
Հիշեցնենք, որ երեկ տեղի ունեցած մամուլի ասուլիսի ժամանակ Նիկոլ Փաշինյանը հայտարարել էր.
«Անցյալ շրջանի մի դրվագի մասին խոսեմ, որը վերաբերում է 29 800 քկմ-ին: Երբ բանակցություններում խոսք գնաց, որ պետք է ճանաչել միմյանց տարածքային ամբողջականությունը, Ադրբեջանը հայտարարում է, որ ճանաչում է ՀՀ տարածքային ամբողջականությունը և տարածքային պահանջներ չունեն:
Ինչո՞ւ է շարունակվում այդ խոսակցությունը, մի պարզ պատճառով: Բրյուսելի բանակցային սենյակում այդ հարցը ծագեց՝ իսկ ի՞նչ նկատի ունի Ադրբեջանը Հայաստանի տարածքային ամբողջականություն ասելով: Ինչ նկատի ունի Հայաստանը Ադրբեջանի տարածքային ամբողջականություն ասելով:
Այս ընթացքում, է որ խոսակցությունը զարգացավ դեպի այն կետը, որ երևի կան օբյեկտիվ տվյալներ, և պետք է հղում անել այդ տվյալի վրա: Գաղափարն ընդհանուր առմամբ դիտարկելի էր, եւ քննարկելի էր: Մենք ասացինք՝ շատ լավ, բայց մի րոպե, ի՞նչ թիվ: Պատկերացրեք իրադրության լարումը, որ կողմերը պետք է ասեն՝ մեր երկրի տարածքը այսքան է»,- ասել է նա:
Ըստ Փաշինյանի հենց այդտեղ առաջացավ գաղափար, որ եկեք ուրեմն, հետո որ դուրս գանք, հայտարարենք այն թիվը, որը ֆիքսված է խորհրդային հանրագիտարանների վերջին հրատարակության մեջ:
«Այդ տվյալները փոխանցվեցին ԵՄ խորհրդի նախագահին և նա այդ թվերը հրապարակեց: Հետո պարզվեց, որ 29 800 թիվը կլորացրած է և տեքստի մեջ կա ուրիշ թիվ՝ 29 743 քկմ: Այդ թվում ադրբեջանական կողմը մեր ուշադրությունը հրավիրեց այն փաստի վրա, որ Հայաստանի պետական մարմինների կայքերում Հայաստանի տարածքը 29 800-ից պակաս է գրված:
»
