Իհարկե, լավ է, որ ՀՀ արտագործնախարարը «AlQahera News»-ին հարցազրույց է տալիս և փորձում մեր թշնամու հետ խնդիրներ ունեցող երկրներին ներկայացնել Ադրբեջանի ապակառուցողական վարքագիծը, սակայն կասկածից վեր է, որ առաջին հերթին մենք պետք է ապավինենք բացառապես ինքներս մեզ՝ հայ ազգի միասնությանը, Azg.am-ի թղթակցի հետ զրույցում ասաց վերլուծաբան Թևան Պողոսյանը՝ անդրադառնալով Արարատ Միրզոյանի՝ եգիպտական լրատվամիջոցին տված հարցազրույցին, որտեղ նա հայտնել է, թե ինչ առաջարկներ է ներկայացրել Հայաստանն Ադրբեջանին խաղաղության պայմանագրում։
Պողոսյանի խոսքով՝ ճիշտ մոտեցում է հայկական կողմի տեսակետները միջազգային ԶԼՄ-ին ներկայացնել, բայց հարցն այն է, թե ՀՀ դիրքորոշումը ներկայացնելիս ո՞ւմ շահերն են սպասարկվում։
«Արարատ Միրզոյանը որևէ նորություն չի հայտնել։ Եթե պետք է արաբական աշխարհին ներգրավել մեզ օժանդակելու, թուրք-ադրբեջանական տանդեմի դեմ պայքարի գործում, գուցե մի փոքր այլ խոսույթ պետք է հնչեր։ Հայտնի դրույթների մասին մամուլն արդեն իսկ գրել է, Ադրբեջանն էլ հայտնել է՝ ինչ է դրանց մասին մտածում։
Կրկնում եմ՝ մենք պետք է միայն և միայն մեզ ապավինենք, իսկ մյուսների հետ պետք է կարողանանք համագործակցել այնքանով, որքանով հայկական շահերն այդ համագործակցության արդյունքում կսպասարկվեն։
Ցավոք, ՀՀ գործող իշխանություններն ինչ անում են՝ արդյունքում սպասարկվում են ադրբեջանաթուրքական շահերը։ Ինչպե՞ս կարող է ժամանակին բոլորիս պառակտած ուժը հիմա միասնություն բերել։ Մեկ անգամ չեմ ասել՝ պարտված իշխանությունը նոր պարտություններ է բերելու»,- եզրափակեց Թևան Պողոսյանը։
Հիշեցնենք, որ ԱՄՆ Կոնգրեսի Ներկայացուցիչների պալատի 69 անդամներ՝ երկու կուսակցություններից, հերթական անգամ հանդես են եկել Ադրբեջանին տրամադրվող ռազմական օգնությունը դադարեցնելու և Արցախին ու Հայաստանին 150 միլիոն դոլարի օգնություն հատկացնելու կոչով:
