Արևմուտքը մեզ կօգտագործի ՌԴ-ի ու Իրանի դեմ, իսկ թուրքերի հարձակման դեպքում կդիմանանք ընդամենը 2 ժամ:
Արթուր Խաչիկյան, ԱՄՆ Սթենֆորդի համալսարանի քաղաքագիտության դոկտոր
Զրուցեցի ԿՀՎ (CIA) նախկին վերլուծաբան, հայտնի քաղաքական մեկնաբան Լարի Ջոնսոնի հետ: Զրույցի առանցքում Հայաստանի շուրջ սեղմվող աշխարհաքաղաքական օղակն է, արևմտյան լիդերների այցը Երևան և Փաշինյանի ինքնասպան քաղաքականությունը։
Ըստ Լարի Ջոնսոնի՝ Եվրոպայի ու ԱՄՆ-ի համար Հայաստանն ընդամենը հարմար “անշարժ գույք է” և ռազմավարական պլացդարմ՝ Ռուսաստանի և Իրանի դեմ գործողություններ սկսելու համար։ Արևմուտքը, տապալվելով Ուկրաինայում և Վրաստանում, այժմ ակտիվորեն օգտագործում է ՀՀ իշխանություններին՝ տարածաշրջանում նոր հրդեհ բորբոքելու նպատակով:
ԿՀՎ նախկին վերլուծաբանը ծաղրեց այն “ռազմական օգնությունը” (4 ռադար, ոչ մահաբեր զենք և խաղաղապահների մեքենաներ), որը Ֆրանսիան ու Եվրոպան տրամադրում են Հայաստանին: Նրա խոսքով՝ այդ ռադարների միակ նպատակը ոչ թե Հայաստանը պաշտպանելն է, այլ արևմտյան հետախուզության համար դեպի Իրան և Ռուսաստան օդային տարածքը վերահսկելը: Իսկ իրական պատերազմի դեպքում այդ տեխնիկան կոչնչացվի հաշված րոպեների ընթացքում, և Եվրոպան ու ԱՄՆ-ն որևէ կերպ չեն կարողանա օգնել՝ լոգիստիկ և աշխարհագրական անհնարինության պատճառով:
Ամերիկացի փորձագետը տարակուսանք հայտնեց նաև Նիկոլ Փաշինյանի ներքին քաղաքականության և Հայ Առաքելական Եկեղեցու վրա հարձակումների կապակցությամբ։ Նա ընդգծեց, որ իշխանությանը պահելու համար Փաշինյանը դարձել է արևմտյան խամաճիկ՝ գնալով ազգային ու քաղաքական ինքնասպանության և վտանգելով աշխարհի հնագույն քրիստոնեական պետության գոյությունը:
