Քաղտեխնոլոգ Արմեն Բադալյանը չի կիսում տեսակետը, որ ԱԺ նախագահ Ալեն Սիմոնյանի եղբոր կնոջ և Էկոնոմիկայի փոխնախարար Անի Իսպիրյանի կալանավորումները իշխանության հերթական շոու են՝ առաջիկա հնարավոր արտահերթ խորհրդարանական ընտրություններից առաջ։
Քաղտեխնոլոգը համաձայն չէ նաև շրջանառվող այն համեմատությունների հետ, որ այսկերպ հեղափոխությունը խժռում է իր զավակներին։
«Կալանավորված անձինք հեղափոխության զավակները չեն. նրանցից մեկն ընդամենը Ալեն Սիմոնյանի բարեկամն է, մյուսը՝ Էկոնոմիկայի փոխնախարար, որը հեղափոխության հետ ուղիղ առնչություն չունի։
Ինչ վերաբերում է հնարավոր ընտրություններից առաջ շոուին, նախ, դեռ հստակ չէ՝ ընտրություններ լինելու են, թե ոչ։ Եթե անգամ ընտրություններ լինեն, այս տեսարանը շատ քիչ է հետագայում որպես ակտիվ PR օգտագործելու համար։ Հնարավոր ընտրությունների ժամանակ այս տեսարանի ազդեցությունը գրեթե զրոյական է լինելու, և այդ օրերին դժվար թե որևէ մեկը հիշի այս կալանավորումների մասին»,- Azg.am-ի թղթակցի հետ զրույցում ասաց Արմեն Բադալյանը։
Քաղտեխնոլոգի կարծիքով՝ առավել հավանական է, որ նախօրեի ձերբակալությունները կապված լինեն «Թրանսփարենսի ինթերնեշնլ»-ի զեկույցի հետ, ըստ որի կոռուպցիայի դեմ պայքարը Հայաստանում էական չէ։
«Շատ հավանական է՝ այդ կտրվածքով է ցուցադրությունն իրականացվում, որ պայքար ծավալվում է։ Սա կարող է մի քանի նպատակ հետապնդել. նպատակներից մեկն այն է, որ հենց «Թրանսփարենսի ինթերնեշնլ»-ի՝ կոռուպցիայի դեմ պայքար չլինելու հայտարարությունից անմիջապես հետո կալանավորումներ եղան՝ ցույց տալու, որ կոռուպցիայի դեմ պայքար իրականում կա։
Երկրորդ, չմոռանանք, որ Էկոնոմիկայի նախարարությունում բավականին ակտիվ ազդեցություն ունի ՔՊ-ական խոշոր գործարար պատգամավորներից մեկը։ Հավանական է, որ ներթիմային գործընթաց է տեղի ունենում տվյալ գործչի թիմակիցներին կամ նրանց մերձավորներին մեկուսացնելու կամ չեզոքացնելու ուղղությամբ։ Այսինքն՝ այս կտրվածքով պետք է նայենք»,- ասաց քաղտեխնոլոգը՝ գրեթե բացառելով, որ Ալեն Սիմոնյանի եղբոր կնոջ կալանավորումը նրա հետ ունեցած ներքին խնդիրների արդյունք են։
Հիշեցնենք, որ դատարանը երեկ 2 ամսով կալանավորեց Ալեն Սիմոնյանի եղբոր կնոջը՝ «Սիներջի» ընկերության աշատակից Անի Գևորգյանին:
Էկոնոմիկայի նախկին փոխնախարար Անի Իսպիրյանի նկատմամբ էլ Հակակոռուպցիոն դատարանը կիրառեց երկամսյա տնային կալանք:
