Ադրբեջանը տեռորի է ենթարկում արցախահայությանը, որպեսզի մարդիկ հուսահատվեն և ի վերջո դուրս գան իրենց հայրենիքից. Աշոտ Սարգսյան

Առաջին իսկ օրը, երբ ադրբեջանցիները փակեցին Արցախը Հայաստանին կապող միակ ճանապարհը,  ՀՀ վարչապետը պետք է դիմեր ՄԱԿ-ին, որովհետև բնապահպանական պատճառների կեղծիքն այնքան ակնհայտ էր, Azg.am-ի թղթակցի հետ զրույցում ասաց Արցախի ԿԳՄՍՆ կրոնի և փոքրամասնությունների բաժնի վարիչ, արցախյան շարժման ակտիվիստ Աշոտ Սարգսյանը։

Վերջինս համակարծիք չէ հայաստանցի շատ վերլուծաբանների հետ, որոնք գտնում են, որ Ադրբեջանը փակել է Բերձորի միջանցքը՝ «Զանգեզուրի միջանցքը» ստանալու համար։

«Բոլորն էլ շատ լավ գիտեն. դա կոնկրետ հանքի խնդիր է, որովհետև ժամանակին Հեյդար Ալիևը Արցախում եղած բոլոր հանքները խոսք է տվել Մեծ Բրիտանիային։ Իրենք շատ լավ գիտեն, որ Հայաստանի և Արցախի տարածքում ահռելի քանակությամբ օգտակար հանածոներ կան։

Բայց այստեղ ոչ միայն հանքի, այլ նաև տեռորի խնդիր է, որպեսզի արցախահայությունը հուսահատվի և ի վերջո դուրս գա իր հայրենիքից»,- ասաց Աշոտ Սարգսյանը՝ շեշտելով, որ ստեղծված բարդագույն իրավիճակում ոչ թե պետք է հուսալքվել, այլ ընդհակառակը՝ ամեն րոպե պատրաստ լինել հայրենիքը պաշտպանելուն։

ԿԳՄՍՆ կրոնի և փոքրամասնությունների բաժնի վարիչի խոսքով՝ երբ ինքն ասում է, որ ամեն վայրկյան պետք է պատրաստ լինել նոր պատերազմի, մարդիկ զարմանում են։

«Մենք միշտ պետք է պատրաստ լինենք պատերազմի, աշխարհազոր ունենանք, սահմանամերձ գյուղերի բոլոր տղամարդկանց զինենք։ Միամտություն կլինի, եթե մտածենք, որ թուրքը խելոքանալու է։ Ես միշտ ասում եմ՝ եթե շրջապատված ես գազաններով, քեզ խոտակար մի՛ ձևացրու, կուտեն։ Մենք չպետք է մոռանանք, թե ինչ տարածաշրջանում ենք ապրում»,- ասաց Աշոտ Սարգսյանը։

Մեր զրուցակիցը շեշտեց՝ Արցախում հումանիտար ճգնաժամ է, բայց խանութները դատարկված չեն, արցախցին դեռ դիմադրում է՝ սովոր լինելով նման իրավիճակների, նման սցենարները հաշվի առնելով՝ միշտ գերազանց է պատրաստվում ձմռանը՝ պահածոներ, սննդի պաշար և այլն։

«Բայց խոսքն այստեղ սննդի մասին չէ, այլ՝ հուսահատության, քանի որ Արցախի ժողովուրդը տեսնում է, որ ՀՀ իշխանությունները համապատասխան միջոցներ չեն ձեռնարկում՝ շտկելու ստեղծված իրավիճակը։

Մյուս կարևոր խնդիրը Արցախում առկա հոգևոր վիճակն է։ Պատկերացնո՞ւմ եք, արդեն երկրորոդ տարին է՝ նոր սրբազան ունենք՝ Վրթանես սրբազանը, բայց թեմական խորհուրդ չունենք։ Մինչդեռ այս պահի դրությամբ ամենակարևորը հոգևոր վիճակն է, որը պետք է կարգավորվի։ Իսկ դրանով ո՞վ պետք է զբաղվի. իհարկե, քահանան և սրբազանը։ Սա ամենաակտուալ թեման է։ Ցանկացած երկիր, որը պետք է սկսի պատերազմել, պետք է հոգեպես պատրաստ լինի»,- ասաց Աշոտ Սարգսյանը։