Azg.am-ի զրուցակիցն է Արցախի անվտանգության խորհրդի նախկին քարտուղար, ՊԲ նախկին հրամանատար Սամվել Բաբայանը։
-Պարոն Բաբայան, Արդարադատության միջազգային դատարանը նախօրեին Ադրբեջանին պարտավորեցրել է ապահովել Լաչինի միջանցքով մարդկանց, տրանսպորտային միջոցների և բեռների անխափան երթևեկությունն ու տեղաշարժը։ Ինչպե՞ս եք գնահատում այս որոշումը։
–Խիստ դրական եմ գնահատում Ադրբեջանի դեմ ժամանակավոր միջոց կիրառելու վերաբերյալ ՄԱԿ-ի արդարադատության միջազգային դատարանի որոշումը։ Այն ոչ միայն սպասված, այլև պահանջված էր։ Ես բազմիցս կրկնել եմ իմ հարցազրույցներում, որ Արցախի հարցը պիտի տանել միջազգային դատարաններ։ Սա առաջին քայլն էր, որ հաջողություն ունեցավ։
–Ի՞նչ եք կարծում՝ Ադրբեջանը կկատարի՞ Հաագայի դատարանի որոշումը, թե կրկին կխուսանավի՝ հաշվի առնելով, որ միջազգային մի շարք պարտավորություններ մինչ օրս այդպես էլ չի կատարել։
–Վստահ եմ, որ Ադրբեջանը չի կատարի դատարանի որոշումը և դրա համար կօգտագործի հակաթեզեր ֆանտաստիկայի ժանրից։ Դա հերթական անգամ ցույց կտա Բաքվի արհամարհանքը միջազգային իրավունքի և հանրության նկատմամբ։
–Ադրբեջանի կողմից դատարանի որոշումը կյանքի չկոչելու պարագայում որո՞նք պետք է լինեն հայկական կողմի քայլերը։
–Անկախ Ադրբեջանի կատարումից կամ չկատարումից՝ հայկական կողմը պետք է շարունակի բոլոր ուղղություններով դիմել դատարան և հարուստ փաստական հիմքեր ձևավորի Արցախի ճանաչման համար։ Բլոկադայից դուրս գալու իրավական ճանապարհից բացի, պիտի անպայման սկսել այլընտրանքային ճանապարհի շինարարությունը, և ոչ միայն։
Հ.Գ. Հիշեցնենք, որ Արդարադատության միջազգային դատարանը նախօրեին որոշել էր՝ Բաքուն պարտավոր է ռասայական խտրականության բոլոր ձևերի վերացման մասին միջազգային կոնվենցիայով ստանձնած պարտավորություններին համապատասխան, ձեռնարկել բոլոր միջոցները՝ ապահովելու Լաչինի միջանցքով մարդկանց, տրանսպորտային միջոցների և բեռների անխափան երթևեկությունն ու տեղաշարժը։
