Չպետք է մոռանալ, որ գործ ունենք հայ ժողովրդի հետ։ Մենք շատ ենք սիրում գովել մեզ, բայց լավ կլինի՝ դուրս գանք մեր կաղապարից և մեզ կողքից նայենք, որովհետև աշխարհում չկա երկրորդ ազգ, որը կարող է պատերազմում պարտված ղեկավարին վերընտրել, Azg.am-ի թղթակցին հետ զրույցում ասաց քաղաքագետ Գագիկ Համբարյանը՝ անդրադառնալով ԱԺ նախագահ Ալեն Սիմոնյանի այն հայտարարությանը, թե «Կիրանցում, Ոսկեպարում ու մյուս գյուղերում 2026 թվականի ընտրություններում ՔՊ-ն հաղթելու է շռնդալից ձևով»։
«Համաշխարհային պատմության մեջ չկա գեթ մեկ օրինակ, որ պարտված առաջնորդը վերընտրվի։ Հայաստանն այս առումով եզակի օրինակ է։ Նիկոլ Փաշինյանն Արցախը հանձնելուց, Շուռնուխի կեսը թշնամուն տալուց հետո՝ 2021 թվականին, նույն Շուռնուխում բնակչության մեծ մասի քվեներն ստացավ։
Եթե այդ ժողովուրդն, անասնական տեսակետներ առաջ տանելով, տգիտության բարձրագույն ձևն առաջ տանելով, մտածում է, թե ռուսը, Արևմուտքը, Իրանը կամ մյուսները պարտավոր են մեզ օգնել, իսկ իրենք էլ առավոտից երեկո հաճույքներ վայելեն, համերգներ գնան կամ Երևանի գլխավոր տոնածառի լույսրեը վառեն, ուրեմն այդ հասարակությունից ի՞նչ եք սպասում։ Հետևապես բացարձակապես չպետք է զարմանալ Ալեն Սիմոնյանի այսպիսի ցինիկ արտահայտություններից»,- նշեց Գագիկ Համբարյանը։
Ըստ քաղաքագետի՝ ՀՀ իշխանությունները Կիրանցը նվիրում են թուրքին, իսկ նույն ընթացքում Երևանում ջազ-փառատոն է ընթանում, ՀՀ սահմանները ոտնձգությունների են ենթարկվում ադրբեջանցիների կողմից, Երևանում գինու տոն են կազմակերպում։
«Ինքնասիրություն ունեցող հայն ի վերջո այստեղ չի ապրելու, որովհետև Հայաստանը լավագույն դեպքում վերածվելու է թուրքական վիլայեթի, իսկ վատագույն դեպքում դառնալու է «Արևմտյան Ադրբեջան»։
Վերջին իրադարձություններն ապացուցեցին, որ հայաստանյան հասարակության մի զգալի մասն ինքնապաշտպանական տարրական բնազդից զուրկ է և մտածում է բացառապես ստամոքսով։ Եթե հայաստանյան հանրությունն այս ամենը տանում է, ուրեմն այս ամենը նաև նրա մեղավորությունն է»,- նշեց մեր զրուցակիցը։
Գագիկ Համբարյանի կարծիքով՝ Ալեն Սիմոնյանի՝ 2026-ին Կիրանցում ՔՊ-ի վերընտրվելու վստահության հիմք կարող է լինել նաև վարչական ռեսուրսի կիրառումը։
«Ինքնախաբեությամբ չզբաղվենք. Փաշինյանն իր իշխանությունը պահպանում է երկու մեթոդով՝վարչական ռեսուրսի և իրեն երկրպագող «ժեխի ու փթիրի»։ Ընդ որում՝ վարչական ռեսուրսի մեջ մեծ դերաբաժին ունի իրավապահ համակարգը, որոնց աշխատավարձերը նա ամեն անգամ բարձրացնում է՝ բառի բուն իմաստով պետական մակարդակով կաշառք տալով՝ իր իշխանությունը պահելու համար»,- ասաց քաղաքագետը՝ ընդգծելով, որ Երևանի ավագանու 2023 թվականի ընտրությունների ժամանակ ամբողջ Շիրակի մարզի առողջապահական համակարգը «բերման էր ենթարկվել» Երևան՝ մասնակցելու Նիկոլ Փաշինյանի հնարահավաքին։
