Այն, որ ռուսները դեմ են Հայաստանի կողմից Հռոմի ստատուտի վավերացմանը և այն կապում են ՌԴ նախագահ Վլադիմիր Պուտինի հետ, առնվազն միամտություն է։ Ստատուտը ՌԴ նախագահի հետ որևէ կապ չունի, և սա առաջին հերթին հենց ռուսներն են շատ լավ հասկանում։ Azg.am-ի թղթակցի հետ զրույցում նման տեսակետ հայտնեց քաղաքագետ Դավիթ Ստեփանյանը՝ անդրադառնալով ՀՀ նախագահի կողմից Հռոմի ստատուտը վավերացնելու մասին օրենքի ստորագրմանը։
Ըստ մեր զրուցակցի՝ այստեղից հարց է առաջանում՝ ինչո՞ւ են ուրեմն ռուսները դեմ Հայաստանի Հանրապետության կողմից վերոնշյալ փաստաթղթի վավերացմանը։
«Կարծում եմ՝ դեմ են, որովհետև Հռոմի ստատուտի ընդունումից հետո, հուսով եմ, լինելու է երկրորդ քայլը. Հայաստանը դատի է տալու Ադրբեջանին՝ իր բոլոր հանցագործությունների համար։ Եվ այստեղ ամենավճռորոշ պահն է գալիս, որովհետև բոլոր հանցագործությունները, որ կատարել է Ադրբեջանն և՛ Արցախի Հանրապետությունում՝ վերջացրած էթնիկ զտումներով, և՛ ամենակարևորը՝ ՀՀ նկատմամբ ( հիշենք 2021 թվականի դրվագները՝ տեսանյութերով, երբ ադրբեջանցիները գնդակահարում են հայ գերիներին), պետք է արժանի ձևով պատժվեն:
Եթե այս ամենը դառնա դատական գործընթացի մաս, բոլոր այս գործողություններում ռուսների դերակատարությունն անխուսափելիորեն երևալու է. ռուսների, որ 2022 թվականի սեպտեմբերի 13-ին անջատել են մեր ՀՕՊ-ը, ռուսների, որոնք ներկա են եղել սահմանի առանձին հատվածներում, Արցախում։ Այսինքն՝ այնպես չէ, որ միայն ադրբեջանցիներն են անցնելու դատական այս գործընթացներով։ Այն կեղտոտ դերը, որ Ռուսաստանը խաղացել է այս ամբողջ հակամարտությունում, ի հայտ է գալու»,- ասաց քաղաքագետը։
Երկրորդ խնդիրն, ըստ Դավիթ Ստեփանյանի, այն է, որ Ադրբեջանի նախագահ Իլհամ Ալիևը Ռուսաստանի իրավիճակային դաշնակիցն է. սա ակնհայտ է դառնում հատկապես 2022 թվականի փետրվարի 22-ին երկու երկրների նախագահների ստորագրած դաշնակցային փոխգործակցության մասին հռչակագրից։
«Այստեղ ամնե ինչ շատ հստակ է. Հռոմի ստատուտի նկատմամբ Ռուսաստանի անհանգստությունը բացատրվում է դրանով։ Պարզ է, որ ռուսները չեն կարող բացահայտ ասել՝ ինչն է իրենց անհանգստության հիմքում ընկած։ Այդ պատճառով էլ փորձում են ստատուտի վավերացումը կապել ՌԴ նախագահի հետ, փորձում դրա դեմ հակափաստարկներ բերել։ Սա է իրականությունը»,- ափոփեց քաղաքագետը։
Հիշեցնենք, որ ՀՀ նախագահ Վահագն Խաչատուրյանը ստորագրել է Հռոմի ստատուտը վավերացնելու մասին օրենքը։ Մոսկվայում Հռոմի ստատուտին միանալու Երևանի ծրագրերը համարում են անընդունելի՝ ՌԴ նախագահ Վլադիմիր Պուտինի դեմ դատարանի կողմից «անօրինական օրդեր» տալու ֆոնին։ Հայաստանի պաշտոնատար անձինք իրենց հերթին հավաստիացնում են, որ վավերացումն ուղղված չէ ՌԴ-ի դեմ։
