Ռուսաստանի և Իրանի նախագահներ Վլադիմիր Պուտինն ու Մասուդ Փեզեշքիանը ստորագրել են Համապարփակ ռազմավարական գործընկերության համաձայնագիր։
Արարողությունը տեղի է ունեցել Կրեմլում, բանակցություններից հետո։
Փաստաթուղթը պետք է նոր մակարդակի հասցնի Մոսկվայի և Թեհրանի հարաբերությունները, այն ամրապնդում է ռազմավարական գործընկերության կարգավիճակը։ Համաձայնագիրը նաև իրավական դաշտ է ստեղծում երկարաժամկետ հեռանկարում համագործակցության հետագա զարգացման համար։
Երկու երկրների պաշտոնյաների խոսքով՝ համաձայնագիրը ներառում է բոլոր ոլորտները՝ ներառյալ պաշտպանությունը, ահաբեկչության դեմ պայքարը, էներգետիկան, ֆինանսները, տրանսպորտը, արդյունաբերությունը, գյուղատնտեսությունը, մշակույթը, գիտությունը և տեխնոլոգիաները:
Պուտինն ու Փեզեշքիանն այնուհետեւ հայտարարություններ են արել մամուլի համար։
